Тургутуу кэмигэр ойуур баһаарын утары охсуһааччылар үрдүк көдьүүстээх күүгэни туттан, хонтуруолламмыт уоту хайдах умулларалларын дьиҥ практикаҕа көрдөрдүлэр. Саҥа техника күлүүһэ "Якутлесресурс" Мэҥэ Хаҥаластааҕы филиалын салайааччытыгар Айсен Никитиҥҥа үөрүүлээх быһыыга-майгыга туттарылынна.
NATISK тиһигин сүрүн өҥөлөрө:
- Үрдүк оҥорон таһаарыылаах: Ккомпрессорынан салгыны холбоон, 500 лиитирэ уулаах установка 10 000 лиитирэ умуруорар веществону оҥорон таһаарар уонна биэрэр кыахтаах.
- Көдьүүстээх уонна ыраахха диэри тиийэр: Күүгэни ытыы ырааҕа 30 миэтэрэҕэ тиийэр. Тиһик умуруоруу бириэмэтин 7 төгүл кылгатар, ууну тоҕууну аҕыйатар уонна хаттаан умайыы кутталын букатын кэриэтэ суох оҥорор.
- Тыйыс усулуобуйаларга эрэллээх: Тэрил экстремальнай тымныыга үлэлииргэ ананар, баһаар миэстэтигэр түргэнник хомуллар уонна аҕыйах киһилээх расчетунан үлэлиир кыахтаах.
«Якутлесресурс» салайааччыта Виктор Омуков эппитинэн, бу оборудованиены атыылаһыы "күөх төлөбүрдэртэн" хомуллубут үп көмөтүнэн кыаллыбыт. Кини тиэхэньиичэскэй паарканы саҥардыы ойуур баһаардарын утары охсуһуу көдьүүһүн үрдэтиигэ инники күөҥҥэ турар сорук буоларын бэлиэтээтэ.
СӨ экологияҕа, айылҕаны туһаныыга уонна ойуур хаһаайыстыбатыгар миниистирэ Евгений Перфильев саҥаны үрдүктүк сыаналаата. Кини этэринэн, сиринэн зонаҕа умуруорууга бу олус үчүгэй холобур:
«Маннык тэрээһиннэр өрөспүүбүлүкэ Ил Дархан Айсен Николаев ойуур баһаардарын утары охсуһуу ньымаларын саҥардыыга уонна көдьүүһүн үрдэтиигэ сорудаҕын иитинэн ыытыллаллар. Маны таһынан, бүгүн саҥа ранецтаах огнетушители боруобалаатыбыт. Саҥа мал көдьүүстээҕин көрдөрдө, сезону түмүктээн баран, түмүгүн ырытан, кинини салгыы туһаныы туһунан быһаарыныы ылыныахпыт. Ону таһынан, Уус Маайа улууһугар номнуо туһаммыт электрическэй автономнай огнетушители туһаныыны үөрэтэбит», — диэн миниистир бэлиэтээтэ.
NATISK УПП-60 тиһигин киллэрии Саха Сирин ойуур баһаарын утары охсуһааччыларын материальнай-техническэй баазаларын бөҕөргөтөрүгэр уонна ойуур баһаардарыгар түргэнник хардарсар кыахтарын үрдэтиигэ улахан хардыынан буолар диэн министиэристибэ суруйар.
Хаартыска: СӨ экологияҕа, айылҕаны туһаныыга уонна ойуур
хаһаайыстыбатыгар министиэристибэ саайта.
-
0
-
0
-
0
-
0
-
0
-
0
