Нерюнгри куорат борокуратуурата судаарыстыбаннай экологическай надзор кэмитиэтин исписэлиистэрин кытта тулалыыр эйгэни харыстааһын туһунан сокуону тутуһууну бэрэбиэркэлээтэ.
Бэрэбиэркэ түмүгүнэн, Улахан Хатымы бөһүөлэгэр ассенизатор массыына канализация кирдээх уутун сир үрдүгэр тохпутун быһаардылар.
Экологическай экспертиза түмүгүнэн, бу сир буора киртийбитэ бигэргэннэ, оҥоһуллубут хоромньу суумата 500 тыһыынча солкуобайга тэҥнэстэ. Маны сэргэ, массыына бас билээччитэ, улууска урбаанынан дьарыктанара быһаарылынна.
Борокуратуура суукка ирдэбил түһэрбитин кэннэ, суут быһаарыытынан, бу киһиттэн тулалыыр эйгэҕэ оҥоһуллубут хоромньу ирдэннэ. Ону таһынан, кинини хонтуруоллуур уорган административнай эппиэккэ тарта, РФ КоАП 8.2 ыстатыйатынан (оҥорон таһаарыы уонна туһаныы тобохторун кытта үлэлиир кэмҥэ тулалыыр эйгэни харыстааһын ирдэбиллэрин тутуспатахха) 40 тыһыынча солкуобайдаах ыстараап анаата.
Суут быһаарыыта сокуоннай күүһүгэр киирэ илик.
-
0
-
0
-
0
-
0
-
0
-
0
