Арассыыйа Бырабыыталыстыбатын бэрэссэдээтэлин солбуйааччы Дмитрий Чернышенко уонна РФ Үөрэҕириитин миниистирэ Сергей Кравцов «Земскэй учуутал» бырагыраама сайаапкаларын хомуйуу барыллаан түмүктэрин билиһиннэрдилэр.
«„Земскэй учуутал “ бырагыраама биһиги бэрэсидьиэммит Владимир Владимирович Путин сорудаҕынан олоххо киллэриллэр, „Ыччат уонна оҕолор“ нассынаалынай бырайыакка киирэр. Кини кыра куораттар уонна дэриэбинэлэр оскуолаларын идэлээх, үлэтигэр бэриниилээх каадырдарынан хааччыйарга көмөлөһөр», — диэн вице-премьер Дмитрий Чернышенко эттэ.
2026 сылга «Земскэй учууталга» кыттаары педагогтар номнуо 16,6 тыһыынчаттан тахса сайаапканы биэрбиттэр — ааспыт сыллааҕар икки төгүл элбэх. Бу суолталаах бырагыраама оскуолаларга да, учууталлар бэйэлэригэр да наадалааҕын бигэргэтэр.
Үөрэх дьыла бүтүүтэ уонна сайын учууталлар сайаапкалары биэриини ордук көхтөөхтүк саҕалаабыттар: үс ый устата ахсаана тохсунньу-ыам ыйдарын кытта тэҥнээтэххэ, икки төгүл улааппыт.
2020 сылтан 2025 сылга диэри бырагырааманан дэриэбинэлэр уонна кыра куораттар оскуолаларыгар 7 тыһыынча кэриҥэ учуутал үлэҕэ ылыллыбыт. Кинилэр ортолоругар тыл үөрэхтээхтэрэ (төрөөбүт тыл, төрөөбүт литература, нуучча тыла, литература, омук тыла) ордук элбэхтэр (2,6 тыһыынча кэриҥэ), иккис миэстэҕэ математика, алгебра, геометрия уонна информатика учууталлара (1,5 тыһыынча кэриҥэ) бааллар. Ону таһынан 1 тыһыынчаттан тахса маҥнайгы кылаас учууталын вакансията сабыллыбыт.
«Земскэй учуутал» бырагыраама кыттыылаахтарын ахсаанынан бастыҥ үһүскэ Сибиирдээҕи, Приволжскай уонна Уһук Илиннээҕи федеральнай уокуруктар киирэллэр.
«Быйыл бырагырааманан барыта 1216 вакансияны сабар былааннаахпыт. Атырдьах ыйын саҥатыгар вакансиялар 20% курдуга кураанах турар. Үлэ дуогабардарын түһэрсии салҕанар, ону тэҥэ күрэхтэһии процедуралара ыытыллаллар. Биһиэхэ Арассыыйа ханнык баҕарар эрэгийиэнин хас биирдии нэһилиэнньэлээх пуунугар оҕолор тэҥ хаачыстыбалаах үөрэҕи ылаллара суолталаах. Ол туһугар „Земскэй учуутал“ бырагыраама олоххо киирэр, чэрчитинэн 1 мөлүйүөн солкуобай кээмэйдээх биирдэ бэриллэр төлөбүр көрүллэр. Оттон Уһук Илиҥҥэ, Донецкай Народнай Өрөспүүбүлүкэҕэ, Луганскай Народнай Өрөспүүбүлүкэҕэ, Запорожскай уонна Херсонскай уобаластарга көспүттэр 2-лии мөлүйүөнү ылаллар», — диэн Сергей Кравцов быһаарда.
«Земскэй учуутал» бырагыраама 2020 сылтан Арассыыйа Бэрэсидьиэнэ Владимир Путин сорудаҕынан олоххо киллэриллэр. 2025 сылтан кини «Ыччат уонна оҕолор» нассынаалынай бырайыак «Педагогтар уонна настаабынньыктар» федеральнай бырайыагар киирэр. 2026 сылга бырагыраамаҕа Арассыыйа Федерациятын 87 субъега (Москуба уонна Санкт-Петербург куораттары тумнан туран) кыттар. Бырагыраама сыала — тыа оскуолаларыгар аһаҕас миэстэлэр ахсааннарын аҕыйатыы, тыа сирин учууталларын социальнай статуһун үрдэтии уонна үөрэх систиэмэтигэр кинилэри тардарга эбии көҕүлээһиннэри оҥоруу.
2026–2028 сылларга бырагырааманан 4 тыһыынча кэриҥэ вакансияны сабар былаан баар.
-
0
-
0
-
0
-
0
-
0
-
0
