Страховой биэнсийэҕэ бигэргэммит төлөбүр номнуо 70 саастан иккитэ улаатыахтаах, онтон салгыы хас 10 сыл аайы эбиллэн иһиэхтээх. Бу туһунан ТАСС-ка Госдуума үлэҕэ, социальнай бэлиитикэҕэ уонна бэтэрээннэр дьыалаларыгар кэмитиэтин баһылыга Ярослав Нилов иһитиннэрдэ.
Билигин биэнсийэҕэ бигэргэммит төлөбүрү икки бүк улаатыннарыы биэнсийэлээх киһи 80 сааһын туоллаҕына оҥоһуллар. Ол гынан баран, Нилов бэлиэтээбитинэн, «эмкэ-томко, мэдиссиинискэй көмөҕө, көрүүгэ-харайыыга эбии ороскуоттар үгүс дьоҥҥо быдан эрдэ үөскүүллэр».
«Биһиги прогрессивнай ньымалаах этии киллэрэн турабыт: 70 сааһын туоллаҕына — бигэргэммит төлөбүрү 100% үрдэтии, 80 сааска — 200%, 90 сааска — 300%. Киһи сааһырдаҕын аайы доруобуйаҕа уонна күн ахсын көрүүгэ-харайыыга сыһыаннаах ороскуота элбиир түгэнигэр, бу биэнсийэ систиэмэтинэн учуоттаныахтаах», — диэтэ дьокутаат.
Кырдьаҕаһынан страховой биэнсийэ — Арассыыйаҕа саамай тарҕаммыт биэнсийэ көрүҥэ — страховой чаастан уонна бигэргэммит төлөбүртэн турар. Страховой чааһын кээмэйэ мунньуллубут биэнсийэ баалларыттан тутулуктаах, оттон бигэргэммит төлөбүрү судаарыстыба быһаарар. 2026 сылга кини 9 тыһыынча 584 солкуобайга тэҥнэһэр, оттон 80 саастаах биэнсийэлээхтэргэ икки бүк улаатар — 19 тыһыынча 169 солкуобайга диэри. Харчыны хат ааҕыы (перерасчет) автоматическайдык оҥоһуллар, эбии төлөбүр төрөөбүт күн кэнниттэн ыйга биэнсийэлээххэ түһэр.
Галина МАТВЕЕВА хаартыскаҕа түһэриитэ
-
0
-
0
-
0
-
0
-
0
-
0
