Владимир Владимирович Колосов, Амма улууһун дьокутааттарын сэбиэтин бэрэссэдэтээлэ:
--Эһигини барыгытын буолаары турар Судаарыстыбаннай Дуума дьокутааттарын талар быһаарыылаах быыбарга көхтөөх кыттыыны ыларгытыгар ыҥырабын!
Бу үс күҥҥэ биһиги бары тыа сирин кыһалҕаларын өйдүүр, суолу-ииһи тутууга, ОДьКХ саҥардыытыгар, тыа хаһаайыстыбатын уонна хотугу аҕыйах ахсааннаах төрүт омуктары өйөөһүҥҥэ судаарыстыба үбүн-харчытын тыырыыга өрөспүүбүлүкэбит интэриэһин туруулаһар кыахтаах дьону талабыт. Аартыка усулуобуйатыгар доруобуйа харыстабылын, үөрэхтээһини сайыннарыы, тырааныспар табыгастаах буолуутун, төрөөбүт тылбытын уонна култуурабытын чөл хаалларыы курдук тыын боппуруостары быһаарар кыахтаах дьон наадалар.
Хас биирдиибит куолаһа суолталаах. Быыбардааччы элбэх кэлиитэ бу биһиги гражданскай өттүнэн сиппиппитин-хоппуппутун көрдөрөр. Быыбарга кыттыбат буолуу бу быһаарыыны атын дьон илиитигэр биэрии...
Биир дойдулаахтарбын дьиэ кэргэҥҥитин кытта быыбардыыр учаастактарга кэлэргитигэр ыҥырабын. Оҕолоргутугар эппиэтинэс холобурун көрдөрүҥ. Быыбар — бу өссө бэйэ-бэйэни кытта көрсөн, күннээҕи кыһалҕалары ырытыһар улахан уопсай бырааһынньыкпыт.
Быыбардыыр учаастактар сарсыарда 8:00 чаастан киэһэ 20:00 чааска диэри үлэлиэхтэрэ. Учаастактаргытын эрдэттэн булан, «Госуслуги» портал нөҥүө эбэтэр территориальнай быыбардыыр хамыыһыраҕа эрийэн испииһэккэ бааргытын бэрэбиэркэлээҥ. Гражданскай иэскитин толоруҥ. Салгыы хайдах олорорбутун бэйэбит быһаарыаҕыҥ.
-
0
-
0
-
0
-
0
-
0
-
0
