Бу күннэргэ XVIII төгүлүн ыытыллар «Моя страна – моя Россия» Бүтүн Арассыыйатааҕы куонкурус финалын кыайыылаахтара билиннилэр. 14-тэн 17-гэр диэри саастаах оҕолорго 21 бастыҥ кыттааччы иһигэр саха кыыһа Елизавета Алексеева ааттанна. Уопсайа кыайыылаах үрдүк аатын дойду 15 регионун үөрэнээччитэ ылбыт.
Кини Үөһээ Бүлүү улууһун «Сомоҕо» оҕо уопсастыбаннай түмсүүтүн лиидэрэ, Өрөспүүбүлүкэтээҕи лиссиэй-интэринээт 11 кылааһын үөрэнээччитэ. Салайааччыта Саргылана Ильина кэпсииринэн, Лиза 5 кылаастан араас тэрээһиннэргэ, куонкурустарга, дьаһалларга кыттан саҕалаабыта улахан кыайыыга сирдээбит.
«Ис иһиттэн билэ-көрө сатыыр, элбэҕи ааҕар-хасыһар, туруоруммут сыалыгар дьулуһар дьоҕурдаах буолан ситиһиитэ үгүс. Сайыҥҥы сынньалаҥ кэмигэр идиэйэ, толкуй бөҕө. Төһө даҕаны биир сыл куоракка киирэн үөрэннэр, «Сомоҕобут» солбуллубат лиидэрэ. Хааччахтааһын кэмигэр интэриниэт ситиминэн үлэлээбит буолан, тэйбитин да билбэккэ хааллыбыт», – диэн олус истиҥник ахтар настаабынньыга Саргылана Лукична.
АНО «Россия – страна возможностей» генеральнай дириэктэрин солбуйааччы Алексей Агафонов иһитиннэрбитинэн, быйылгы куонкуруска 14-17 саастаах оҕолорго Арассыыйа 46 регионуттан 126 оҕо финалга тахсыбыт.
«Киһи үөрэрэ диэн үрдүкү кылаас оҕолорун үлэлэрин сыаналыырга эксперт быһыытынан урукку сылларга куонкуруска кыттыбыт ыччаттарбыт үлэлээтилэр. Мин санаабар, саамай суолталааҕа – кыттааччылар куонкуруска аҕалбыт бырайыактара салгыы кэҥииригэр, ис хоһооно байарыгар сүбэлэри, сонун санаалары иһиттилэр. Уопсайынан хардарыта дьайсыы, алтыһыы баара кэрэхсэбиллээх», – диэн тэрийээччи санаатын үллэстэр.
Елизавета Алексеева куонкуруска «Моя страна. Моя история. Мой космос» диэн хайысхаҕа хапсан, «Үөһээ Бүлүү улууһуттан кыайыыны уһансыбыт ийэлэр хорсун быһыылара» диэн бырайыагын көмүскээбит. Үлэ сүрүн ис хоһооно сэрии толоонугар уолаттарын сүтэрбит ийэлэр сырдык ааттарын үйэтитиигэ анаммыт.
«Биһиги ыар сүтүктээх ийэлэри испииһэктээн, көрсөн кэпсэтэн эрэ буолбакка, барытын диктофоҥҥа устан, кинигэ таһаарарга санаммыппыт. Тоҕо диэтэр кинилэр кэпсээннэрин нөҥүө аныгы ыччат уруккуну уонна билиҥҥини тэҥнээн көрөн, хайдах курдук уустуктары туораан эйэлээх олоххо үктэммиппитин сыаналыыр кыахтаныахтаах. Бу тугунан да кэмнэммэт, толук ууруулаах, алдьатыылаах сэрии тиэмэтэ үгүс дьон болҕомтотун ылыахтаах, толкуйга туһаайыахтаах», – диир бырайыак ааптара.
Елизавета Бүтүн Арассыыйатааҕы куонкуруска кыттан «Россия – страна возможностей» платформа көмөтүнэн «Ийэ сүрэҕэ – саллаакка» («Сердце солдатской матери») кинигэтин үтүө холобур быhыытынан тарҕатар, поисковай үлэҕэ оҕолору сыhыарар баҕалаах эбит. Маныаха айар үлэ түгэннэрин, геройдары кытта долгутуулаах сэhэргэhиилэри устан, «Саха» НКИК каналыгар биэрии бэлэмнээн, маҥнайгы үктэли оҥорбуттар.
Өрөспүүбүлүкэ Аҕа быһылыга Айсен Николаев кыайыылаах үрдүк аатын сүкпүт Елизаветаҕа уонна кини салайааччыларыгар: С.Л. Ильинаҕа уонна А.Г. Николаеваҕа, Үөһээ Бүлүү улууһун «Сомоҕо» оҕо уопсастыбаннай түмсүүтүн тэрийээччилэригэр, махтал суруктары уонна өйдөбүнньүк бэлэхтэри олохтоото, айымньылаах үлэлэригэр ситиһиилэри баҕарда.
-
0
-
0
-
0
-
0
-
0
-
0
