Издательский дом Редакция Подписка
Погода в Якутске: . 17 oC

Сэрии толоонугар охтубут хорсун саллааттар көмүс уҥуохтарын көрдүүр этэрээт 2007 сыллаахха киһи уҥуоҕун кырамтатын уонна медальонун булбуттар. Ол мин таайым Дмитрий Алексеевич Максимов эбит...

Сэрии толоонугар охтубут хорсун саллааттар көмүс уҥуохтарын көрдүүр этэрээт 2007 сыллаахха киһи уҥуоҕун кырамтатын уонна медальонун булбуттар. Ол мин таайым Дмитрий Алексеевич Максимов эбит...

Эбэм Елена Алексеевна улахан убайа Дмитрий Алексеевич Максимов уҥуоҕун уонна сэриигэ бэйэтиттэн араарбакка илдьэ сылдьыбыт медальонун «Детский орден гражданского подвижничества имени С.С. Смирнова» диэн оҕолор этэрээттэрин байыаһа Софья Месхи булбут. Ити булумньу туһунан суругу ол сыл өрөспүүбүлүкэбит Москваҕа бастайааннай бэрэстэбиитэлин солбуйааччы Иван Долинин Таатта улууһун оччотооҕу баһылыга М.А. Протодьяконов аатыгар ыыппыт. Ол эрээри, тоҕо эрэ, биһиэхэ тута биллэрбэтэхтэр.

2008 сыллаахха Москва уобалаһын Шаховскай оройуонун Спас-Вилки дэриэбинэтигэр таайбын элбэх саллаат кырамтатын кытта биир ииҥҥэ көмпүттэр. Барыларын аатын, үйэлэргэ суураллыбат-умнуллубат гына, мэҥэ тааска суруйан үйэтиппиттэр.

Таайым 1939 сыллаахха диэри Чурапчытааҕы педучилищеҕа үөрэммит. Чычымахха учууталлаабыт. 1940 сыллаахха Дьокуускайдааҕы байыаннай оскуоланы бүтэрбит. Онтон Иркутскайга байыаннай үөрэххэ ыыппыттар. Ити сыл балаҕан ыйын 20 күнүттэн младшай хамандыыр Дмитрий Максимов Улан-Удэ аттынааҕы байыаннай чааска сулууспалаабыт. Ол туһунан табаарыһыгар Николай Филипповка, Таатта типографиятын үлэһитигэр, сурук суруйбут. Таайбытын кытта биир кэмҥэ онно Тааттаттан Гаврил Егорович Петров, Николай Егорович Саввин сулууспалаабыттар эбит.

1941 сыл бүтүүтэ Д.А. Максимов сэриигэ баран иһэр биир дойдулаахтарын, Чкалов холкуос чилиэннэрин, бырааттыы Иннокентий, Максим уонна Гаврил Кычкиннары көрсөн, хаартыскаҕа түспүтэ баар. Бу уолаттар бары сэриилэһэ сылдьан өлбүттэр. Оттон биһиги убайбыт сэриигэ ханан, хайдах сылдьыбытын туһунан туох да докумуон суох. Таатта улууһун «Память» кинигэтигэр өлбүт сыла уонна ыйа эрэ суруллубут. Онон көмүс уҥуоҕа көстүбүтүттэн, хойутаан да буоллар, киһилии сиэринэн хараллыбытын истэн үөрбүппүт.

Алекс ПОПОВ, Дьохсоҕон, Таатта

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением