Пленарнай мунньахха барыта 17 сокуон барыла, ол иһигэр 16 сокуон барыла бастакы ааҕыыга итиэннэ 34 уураах ылылынна.«Саха Өрөспүүбүлүкэтин Сир туһунан кодексыгар уларытыылары киллэрэр туһунан» сокуон барылыгар сүрүн иһитиннэриини үлэ уонна социальнай сайдыы миниистирэ Елена Волкова, хос иһитиннэриини Ил Түмэн дьиэ кэргэн уонна оҕо аймах дьыалаларыгар сис кэмитиэтин бэрэссэдээтэлэ Алена Атласова оҥордулар.
Пленарнай мунньахха барыта 17 сокуон барыла, ол иһигэр 16 сокуон барыла бастакы ааҕыыга итиэннэ 34 уураах ылылынна.«Саха Өрөспүүбүлүкэтин Сир туһунан кодексыгар уларытыылары киллэрэр туһунан» сокуон барылыгар сүрүн иһитиннэриини үлэ уонна социальнай сайдыы миниистирэ Елена Волкова, хос иһитиннэриини Ил Түмэн дьиэ кэргэн уонна оҕо аймах дьыалаларыгар сис кэмитиэтин бэрэссэдээтэлэ Алена Атласова оҥордулар.
Сокуон барыла Сир федеральнай Кодексын үс уонна онтон элбэх оҕолоох ыалларга көрүллэр социальнай өйөбүл кэрискэтин кэҥэтэн, олорор дьиэнэн хааччыйыыга альтернативнай дьаһал быһыытынан, сир учаастагын оннугар биир кэмнээх көмөнү биэрэр туһунан 39.5 ыст. 6-с пуунугар сөп түбэһиннэрэн оҥоһуллубут. 2011 сылтан босхо сир учаастага 10 484 элбэх оҕолоох ыалга, быйыл 219 ыалга, бэриллибит. Билигин уочаракка 15 244 ыал турар, итинтэн 11 889 ыал киин куоракка сир ылыан баҕарар. Бу халыҥ уочараты хамсатарга босхо сир оннугар биир кэмнээх көмө (200 тыһ. солк.) бэриллэр буолбут. Учаастак ылбыт кэнниттэн инфраструктура кыһалҕата күөрэйэр, билиҥҥитэ уот ситимэ 6,9 тыһ. учаастакка, гаас 3,3 тыһ. учаастакка киллэриллибит. Бу хайысханан быйыл 140 мөл. солк көрүллэн, 500 учаастакка үлэ бара турар. Кэлэр сылга олус аҕыйах харчы (50 мөл.) көрүллүбүт, дьиҥинэн 350 мөл., аҥардас бырайыактаах симиэтэҕэ 71 мөл. солк наада эбит.
– Элбэх оҕолоох ыал өйөнөрө үчүгэй, өйөнүөхтээх даҕаны. Сир учаастагын сыаната «200 тыһыынча» диэн тыа сиригэр син барсыан сөп буоллаҕына, куоракка, чуолаан гаастаах, уоттаах учаастакка олус кыра. Сомоҕолоһуоҕуҥ дии сылдьан, уһаайба ылаары уонча сыл уочараттаабыт элбэх оҕолоох ыалларга «учаастак биэрбэппит, ол оннугар 200 тыһ. солк. ылыҥ уонна уочараттан тахсыҥ» диир төһө сиэрдээҕий? Онон боппуруоһу сис кэмитиэккэ хат көрөргө этэбин, – диэтэ норуот дьокутаата Вячеслав Куличкин.
Норуот дьокутаата Алиш Забид оглы Мамедов гааһа, уота суох сиргэ учаастагы биэрии кыһалҕаны быһаарарын оннугар элбэтэрин санатта. Дьүүллэһии түмүгүнэн, сокуон барыла бастакы ааҕыыга ылылынна.
