Уопсастыба

Эрдэ бу боппуруос сис кэмитиэттэринэн уонна фракцияларынан көрүллэн турар, ол да буоллар, дьокутааттар Бырабыыталыстыба Бэрэссэдээтэлин бастакы солбуйааччы эбээһинэһин толорооччунан үс ый үлэлээбит киһи сүрүннүүр хайысхаларын төһө дириҥник билэрин, ОДьКХ, хотугу собуос, Эргиэн-логистика кииннэрин, оттугунан-уматыгынан хааччыллыы, тарыыптар уонна субсидиялар, о.д.а. курдук өрөспүүүлүкэ күннээҕи олоҕор-дьаһаҕар улахан суолталаах салааларга тус көрүүлэрин истиэхтэрин баҕаран, бэрт үгүһү иҥэн-тоҥон ыйыттылар. Элбэҕи сүбэлээтилэр-амалаатылар.
– Түгэнинэн туһанан Николай Владимировичка дьиэлэрин электроуотунан сылытар ыаллар ааттарыттан мин махтаныахпын баҕарабын. Ааспыт саас өҥө төлөбүрүн тарыыба аһара үрдээн долгуйуу үөскээбитигэр, тута быһаарыыны ылан, тарыыбы суоттааһыны саҥалыы оҥорон, тустаах федеральнай биэдэмистибэлэргэ көмүскээн, кинилэргэ тылын ылыннарбытын түмүгэр, өрөспүүбүлүкэ олохтоохторун интэриэстэрэ учуоттаммыта, кэккэ чэпчэтиилэр киллэриллибиттэрэ. Аҥардас ити да түгэн кини улахан, эппиэттээх дуоһунаска үлэлиир кыахтааҕын көрдөрөр. Оттук-энэргиэтикэ балаансата оҥоһулларын туһунан үөрэ иһиттим, стратегия, былааннааһын уонна энэргиэтикэ өрөсүүрсэлэрин туһаныы барыта онтон тутулуктаах. Гаастааһын өрөспүүбүлүкэтэҕи исхиэмэтин оҥорууну суһалсытарга этэбин, тоҕо диэтэххэ, федеральнай генеральнай исхиэмэҕэ киирсибэккэ хаалар кутталлаахпыт. Оттон ОДьКХ салаатыгар ис кыахтары туһанар, гаастаах сирдэргэ хочуолунайдары гааска көһөрөр, оттон чоҕунан үлэлиир хочуолунайдарга кэлэр сылтан олохтоох чоҕу туһанар наадатын өссө төгүл санатабын. Николай Бочков кандидатуратын өйүүбүн уонна биир идэлээхтэрбин, норуот дьокутааттарын, өйүүргүтүгэр ыҥырабын, эдэр киһи үтүө суобастаахтык үлэлиэҕэ диэн эрэнэбин, – диэтэ Владимир Прокопьев.
Елена Голомарева Нижнеянскай кыһалҕатын боппуруоһунан элбэх кэпсэтии барбытын санатта, уу ааллара сылдьар өрүстэрин дириҥэтиигэ 20 агрегат оннугар икки эрэ тиэхиньикэ туруоруллубут буолан, үлэ наһаа бытааннык ыытылларын, манна мониторинг суоҕа, хотугу өрүстэр үлэһиттэрин хамнастара намыһаҕа, ааллар эргэриилэрэ, үп ситэтэ суох көрүллэрэ барыта эбиллэн, итинник кэлим кыһалҕа үөскээбитин быһаарда. Бу боппуруостарга Судаарыстыбаннай Дууманы уонна Арассыыйатааҕы муора-өрүс флотун салалтатын кытары парламент Бырабыыталыстыбаны кытары бииргэ үлэлээтэхпитинэ эрэ үчүгэй түмүктэри ситиһиэхпит диэтэ. Вячеслав Куличкин Николай Бочков баартыйата суоҕун бэлиэтээн туран, бэлиитикэлээбэккэ, дьыалабыайдык үлэлииргэ, дьокутааттар этиилэрин болҕомтоҕо ыларга сүбэлээтэ.

Никита Тимофеев оттук, сылытыы ороскуотун толуйуу төлөбүрүгэр көрүллэр субсидия кээмэйэ үрдээһинин намтатыы үлэтэ билиҥҥитэ туох да түмүгэ суох, тарыыбы оҥоруу сорох методиката олус эргэрдэ, итинник үрдүк тарыыпка төһө да элбэх харчыны куппут иннигэр, тарыыптар араастаһыылара син биир үрдүү туруоҕа диэтэ. Кинини ситэрэн, Федот Филиппов тарыып төрдүн-төбөтүн үөрэтэр, туох холбуу ааҕылла сылдьарын быһаарар, сылытыыга, уокка, хомунаалынай өҥөҕө кытаанах кэмчилээһини киллэрэр, салалта хаачыстыбатын тупсарар ирдэнэрин эттэ. Василий Николаев быйыл ОДьКХ өҥөтүн тарыыба үс төгүл, уматык сыаната 50 % үрдээтэ, улахан салайар үлэҕэ экэниэмикэ төрүттэрэ эрэ буолбакка, олоххо, үлэҕэ уопут ирдэнэр диэн туран, кандидатураны өйөөбөтүн биллэрдэ.
Кистэлэҥ куоластааһын түмүгүнэн, Николай Бочков өрөспүүбүлүкэ Бырабыыталыстыбатын Бэрэссэдээтэлин бастакы солбуйааччынан ананарыгар сөбүлэҥи биэрэри биэс дьокутаат утарда, биир туттунна, атыттар өйүүллэрин биллэрдилэр. Спикер Алексей Еремеев киниэхэ ситиһиилээх үлэни баҕарда.

Хаартыска: Василий Кононов.