Сокуон барыла өрөспүүбүлүкэ муниципальнай тэриллиилэрин ааттарын Арассыыйа Федерациятын муниципальнай тэриллиилэрин судаарыстыбаннай реестригэр итиэннэ сир-уот аатын судаарыстыбаннай кэлим каталогар сөп түбэһиннэрэргэ анаан оҥоһуллубут. Кэккэ улуустар, нэһилиэнньэлээх пууннар ааттара, статустара чопчуламмыт. Холобур, сабыллыбыт Нагорнай бөһүөлэк нэһилиэнньэлээх пууннар кэрискэлэриттэн таһаарыллыбыт, Эдьигээн улууһа «Эдьигээн эбэҥки национальнай улууһа (оройуона», Өлөөн улууһа «Өлөөн эбэҥки национальнай улууһа (оройуона)», Улахан Нимныыр бөһүөлэгэ «Улахан Нимныыр сэлиэнньэтэ» диэн буолбуттар. Ити курдук барыта 233 чопчулааһын, көннөрүү оҥоһуллубут.
– Бу сокуон барыла парламент көрүүтүгэр бастакы эрэ сырыытын киллэриллэр буолбатах, ол тухары төрүт тупсарыллыбат уонна көннөрүллүбэт. Ама, уон сыл тухары «Словарь географических названий Якутской АССР (М, 1987) уларытыылары киллэрэр кыаллыбата дуо? Александр Власов бырабыыталыстыба бэрэссэдээтэлинэн үлэлиир сылларыгар бу боппуруоска болҕомтотун уурар этэ. Барылга сорох тыллар транскрипциялара сыыһа: Абый Кэбэргэнэтэ «Куберганя» буолбут, биир да сахалыы дорҕооно суох тыл «Кэбэргэнэ» диэн бэйэтинэн барыан сөп этэ. Сорох сиргэ «национальный эвенкийский», сороххо «эвенкийский национальный» диэн сылдьар, миэстэлэрин атастаһыннардахха туох уларыйара буолла? Биир тыл сорох сиргэ кавычкалаах, атыҥҥа кавычката суох суруллубут. «Ҥ» буукуба «нг» уонна «н» буукубаларынан бэриллибит. Ити курдук, араастаһыы, сыыһа-халты элбэх. Олохтоох салайыныы департамена сокуон барылын оҥороругар тоҕо маны көрбөтө? Онон бастакы ааҕыыга ылынан баран, тыл үөрэхтээхтэрин кытыннаран, көннөрөргө этиэххэ, – диэтэ Ил Түмэн бэрэссэдээтэлин бастакы солбуйааччы Александр Жирков.
-
0
-
0
-
0
-
0
-
0
-
0
