«Бастатан туран, бырайыактар уопсастыбаннай эбийиэктэрин тутуутун уонна саҥардыытын, сири-уоту тупсарыыны кытта сибээстээх. Ол курдук, үбүлүөйдээх сылга 1-ы Дьөккөн нэһилиэгин түмэл-дьиэ тутуллуоҕа, Уулаах-Аан сэл. аһаҕас халлаан анныгар «Үс Сэргэ» түмэл комплекса тэриллиэҕэ, Покровскай куорат фонтаннаах болуоссатыгар Саха АССР тэриллиитигэр, сайдыытыгар уонна сайыннарыытыгар улахан кылааты киллэрбит хаҥаластарга аналлаах монумент туруоҕа, «Орто дойдуга» Саха балаҕанын туруоруута, Тиит-Арыы сэл. Н.А. Каландарашвили этэрээтэ тохтоон ааспыт миэстэтигэр стелла оҥоһуута былааннаналлар» - диэн Олег Валериевич бэлиэтиир. Ону сэргэ Төхтүргэ «Куллаты» ытык сирдэрин тупсарыы тэрээһиннэрэ салҕанан барыахтара.
Туспа бөлөҕүнэн Саха АССР сайдыытыгар боччумнаах кылааты киллэрбит уһулуччулаах диэйэтэллэр ааттарын үйэтитэр дьаһаллар буолаллар. Оройуоҥҥа ытык биир дойдулаахтара, Саха сирин бастакы Бэрэсидьиэнэ Михаил Николаев 85 сааһын бэлиэтиэхтэрэ. Оттон бу ыйга бэлитиичэскэй диэйэтэл, Саха АССР Үрдүкү Сэбиэтин Президиумун бэрэссэдээтэлэ София Петровна Сидорова аатын Ой нэһилиэгин уопсастыбаннай киинигэр иҥэрии үөрүүлээх тэрээһинэ ыытыллыаҕа. Оройуон салалтата Решетникова З.В. уонна Широких А.Д. ааттарынан түөскэ кэтиллэр бэлиэлэри бигэргэтэр былааннаах. Хаҥалас дойдутун биллиилээх кыыстарын уонна уолларын ааттара умнуллуо суоҕа.
Ону таһынан үбүлүөйдээх сыл успуорт тэрээһиннэринэн баай. Быйыл 15 төгүл ыытыллар «Хаҥалас хапсаҕайа» өрөспүүбүлүкэтэҕи турнир ыытыллыаҕа. Ыам ыйыгар нэһилиэктэр ортолоругар «Улууспутун үлэнэн албан ааттыыбыт» диэн эстафета буолуоҕа. Култуура эйгэтин тэрээһиннэрэ нэһилиэнньэ бүттүүнүн хабар: оскуола оҕолоро, үлэ кэлэктииптэрэ, оройуоннааҕы Сэбиэт дьокутааттара, оройуон Сэбиэтин дьокутааттара, уопсастыбаннас. Сэтинньи ыйга А. В. Дмитриев аатынан Ой орто оскуолата 100 сылын, ахсынньыга А. И. Притузов аатынан Уулаах-Аан орто оскуолата 125 сылын бэлиэтиэхтэрэ .
-
0
-
0
-
0
-
0
-
0
-
0
