Саха сирин Ил Дархана Айсен Николаев Саха сирин бары олохтоохторун бэлиэ күнүнэн ис сүрэҕиттэн эҕэрдэлээтэ.
“Ыһыах ханнык баҕарар кэмҥэ хас эмэ үйэлэр устата бииргэ олорор Саха сирин бары омуктара биир бигэ санаалаах уонна сомоҕо күүс буолууларын кэрэһитэ. Төһө да олох очурдара-чочурдара бииртэн биир күөрэйэн тахса турбуттарын үрдүнэн, туох баар бары ыарахаттары бары бииргэ туоруубут уонна кыайыылары ситиһэн үөрүүнэн кынаттанабыт. Быйыл кутталлаах дьаҥ туран аан дойду күннээҕи олоҕун-дьаһаҕын тосту уларытта. Күн бүгүн дьон доруобуйатыгар кыһаллыы бастакы миэстэҕэ турда. Ол иһин быйылгы ыһыаҕы биһиги ураты көрүҥнээх бэлиэтиибит. Өлүөхүмэ уонна өрөспүүбүлүкэ дьоно-сэргэтэ барыта күүппүт Олоҥхо Ыһыаҕа эһиил хайаан да буолуоҕа. Быйылгы Туймаада Ыһыаҕа, Арассыыйаҕа саамай киэҥ хабааннаах төрүт бырааһынньык быһыытынан биллэр бэлиэ түгэн, онлайн көрүҥүнэн барыаҕа. Бүгүҥҥү бырааһынньыктааҕы күҥҥэ, илии илиилэрбититтэн сиэттиһэн, оһуохайга киирэн биир сомоҕо буолар кыахпыт суоҕүн үрдүнэн, биһиги бары өйдүүн-санаалыын сомолоҕоһон, бииргэ буолан, бэйэ бэйэбитин өйөһүөхпүт. Ыһыах Саха сирин омугун барытын сомоҕолуур, итиэннэ ыалдьытымсах майгыбыт уонна үтүө санаабыт бастыҥ туоһута буолар. Оннук мэлдьи үйэлэргэ буола да туруо!” – диэн Айсен Сергеевич эҕэрдэтин тиэртэ.
Айсен Николаев норуот бүтүннүүтэ сүгүрүйэр үөрүүлээх түгэнин туох да күлүгүрдүө суоҕа диэн эрэллээҕин биллэрдэ уонна Саха сирин бары олохтоохторугар эйэни, үтүөнү, доруобуйаны баҕаран туран:
“Күндү доҕоттор! Үрүҥ Тунах Ыһыахпыт норуоппут санаатын күүһүртүн, дьоҥҥо-сэргэҕэ бигэ туругу, үрдүк ситиһиини, дьолу тосхойдун! Уруй-туску! Айхал-Мичил!” – диэн бэйэтин алгыһын анаата.
-
0
-
0
-
0
-
0
-
0
-
0
