«Ытыктабыллаах Павел Павлович!
Бүгүҥҥү долгутуулаах уонна үөрүүлээх күммүтүгэр Эйиэхэ, Сахабыт Сирин чулуу киһитигэр, Ил Түмэҥҥэ дьокутааппытыгар, тустууга ССРС спордун маастарыгар, Олимпийскай чөмпүйүөҥҥэ барҕа махтал тылларын аныахпытын баҕарабыт.
Биһиги ыал буолбуппут 11 сыл буолла. Икки уоллаахпыт, кэрэчээн кыыстаахпыт. Дьылҕа ыйыытынан иккиэн истибэт, саҥарбат дьоммут. Икки уолбут эмиэ оннук дьылҕалаахтар, реабилитационнай кииҥҥэ дьарыктаналлар.
Кыһалҕабытын өйдөөн, күүс-көмө буолбуккут, ыра санаабыт олоххо киирэригэр олук уурсубукут иһин сүгүрүйэн туран, махталбытын тиэрдэбит. Эһиги үтүө санааҕыт биһиэхэ күүһү-күдэҕи эппитин билинэн туран, бэйэҕэр, чугас дьоҥҥор чэгиэн доруобуйаны, саппаҕырбат санааны, үтүө-мааны олоҕу баҕарабыт. Күөх халлааҥҥыт өрүү чаҕылхай күннээх, тулалыыр эйгэҕит куруутун маннык сырдык санаа эрэ сыдьаайдаах буоллун диэн алгыс тылбытын аныыбыт.
Дириҥ махталы кытары Сахаайа, Александр Павлуцкайдар».
Павлуцкайдар инбэлиит быһыытынан олорор дьиэнэн хааччыйыы уочаратыгар 106-с эбиттэр. Өтөрүнэн дьиэлэниэ суохпут диэн ыксааннар, «Биир ньыгыл Арассыыйа» бэлитиичэскэй баартыйа приемнайын нөҥүө Чурапчы улууһуттан норуот дьокутаата Павел Пинигиҥҥэ көмөлөһөрүгэр көрдөһөн, сурук суруйбуттар. Онуоха норуот дьокутаата улуус дьаһалтатын уонна Тутуу министиэристибэтин кытары күүскэ үлэлэһэн, бу үс кыра оҕолоох ыал уочаракка быһа киллэриллэрин ситиспит.
Ол түмүгэр Чурапчы улууһун дьаһалтата эдэр ыаллары олорор дьиэнэн хааччыйыыга туһуламмыт «Саха Өрөспүүблүкэтигэр 2020-2024 сс. тупсаҕай дьиэнэн хааччыйыы, итиэннэ олох-дьаһах хомунаалынай өҥөтүн хаачыстыбатын тупсарыы» судаарыстыбаннай бырагыраамаҕа киллэрэн, Сахаайа уонна Александр Павлуцкайдар дьиэ атыылаһалларыгар биитэр тутталларыгар социальнай субсидиянан туһанар кыахтаммыттар. Ону туоһулуур Сибидиэтэлистибэни кинилэргэ улуус баһылыга Степан Саргыдаев Дьиэ кэргэн күнүгэр туттарбыт.
-
2
-
0
-
0
-
0
-
0
-
2
