Хапытаалынай өрөмүөн бырагырааматынан быйыл киин куоракка уонна 15 улууска 38 оскуола өрөмүөннэниэҕэ диэн өрөспүүбүлүкэ премьерэ Андрей Тарасенко иһитиннэрдэ.
– Үөрэх дьылын көрсө өрөмүөн үлэтин бүтэрэр ирдэнэр, – диэтэ кини.
Күн бүгүҥҥү туругунан хапытаалынай өрөмүөн ыытыллар эбийиэктэригэр былааннаммыт үлэ 82 %-а бүтэриллибит. Арай, Булуҥ улууһун киинигэр, Тикси 1 №-дээх оскуолатыгар бытаарыы тахсыбыт. Үлэ 39 %-а эрэ оҥоһуллубут. Бырабыыталыстыба Бэрэссэдээтэлэ тустаах министиэристибэ бэдэрээччити суһаллык уларытан, тутууга үлэлиир киһи ахсаанын элбэтэригэр сорудахтаата.
Владимир Путин оскуолалары хапытаалынайдык өрөмүөннээһин икки сыллаах бырагырааматын 2026 сылга диэри оҥорорго дьаһайбыта. Саха Өрөспүүбүлүкэтигэр бу бырагырааманан 2022-2023 сс. 2 млрд 889 мөл солк көрүллүбүтэ. Федеральнай субсидиянан хапытаалынай өрөмүөн уонна сөргүтүү үлэтэ 25 улууска, 58 эбийиэккэ ыытылла турар, онтон сороҕо быйыл, сороҕо кэлэр сылга бүтэриллиэҕэ. Ону таһынан өссө 46 оскуоланы, ол иһигэр Арктика оскуолаларын, өрөмүөннээһиҥҥэ эбии үп көрүллүбүтэ. Инньэ гынан, өрөспүүбүлүкэ үрдүнэн 104 оскуолаҕа хапытаалынай өрөмүөн үлэтэ ыытыллар. Бырагыраамаҕа өрөмүөнү таһынан, оскуолалары миэбэлинэн уонна туттар тэрилинэн хааччыйыы киирэр.
-
0
-
0
-
0
-
0
-
0
-
0
