Уопсастыба

Бүгүҥҥү туругунан тутуу үлэтэ 25 %-на бүтэн турар. Алта этээстээх киин монолитнай каркааһын 60 %-нын дьэндэттилэр. Манна уопсайа 12 тыһ. кубометр бетону куттулар. Сыл бүтүүтэ тутууну үрдүттэн ичигэс бүрүһүнүнэн сабыахтара. Оччоҕо тутааччылар эбийиэккэ кыһыннары үлэлиир кыахтаныахтара.

Култуура киинэ Сайсары күөл үрдүгэр турар. Киин уопсай иэнэ – 33 тыһ. км.м., үрдүгэ – 36,7 м. Судаарыстыбаннай филармония саала 700, онтон Арктикатааҕы киин 800 миэстэлээх буолара былааннанар. Быыстапкалары уонна дьыалабыай тэрээһиннэри ыытарга анал сирдэр баар буолуохтара. Киин чугаһынааҕы сирдэри эмиэ тупсаран саҥалыы оҥоруохтара, киэргэтиэхтэрэ. Ол курдук, күөл кытылын бөҕөргөтүөхтэрэ, сатыы хаамар суолу тупсарыахтара, маны таһынан 1500 миэстэлээх массыына парковкатын оҥоруохтара. Эбийиэк архитектуратынан, тас көстүүтүнэн уһулуччу буолуоҕа. “Бу – ирбэт тоҥ үрдүгэр тутуллар, улахан мастааптаах соҕотох култуура киинэ. Маннык тутуу Аан дойдуга суох” диэн бэлиэтээн этэллэр.

ГЧП бырайыага олоххо киирдэҕинэ, Саха сиригэр норуоттар икки ардыларынааҕы таһымнаах улахан тэрээһиннэр ыытыллар кыахтаныахтара: таһымнаах кэнсиэрдэр, тыйаатыр туруоруулара, шоу-бырагыраамалар, конференциялар уо.д.а. Култуура уонна ускуустуба эйгэтин 530 кэриҥэ үлэһитэ үлэ миэстэтинэн хааччыллыаҕа.

Улахан таһымнаах бырайыак инвестора, чааһынай партнёра – “ВИС” бөлөх. Үпкэ-харчыга партнёр – “Газпромбанк”. Эбийиэк үлэҕэ киирбитин кэннэ сэттэ сыл устата “ВИС” тэрилтэ тутуу инженернэй ситиэмэтигэр, идэтийбит анал тэриллэригэр тиийэ тэхэньиичэскэй эксплуатациятын хааччыйыаҕа, көрүөҕэ-истиэҕэ.