Дьиэ туттар хоту улуустар олохтоохторугар тутуу матырыйаалын тиэрдэргэ көмөнү олоххо киллэрии мэхэньииһимэ СӨ Ил Дарханын А. Николаев сорудаҕынан оҥоһуллубута. Маныаха, кыраасданнар Дьокуускай куоракка тутуу матырыйаалларын атыылаһан баран улуус киинигэр диэри босхо тиэрдэри хааччыйар Аартыкатааҕы эргиэн-логистика хампаанньатын базатыгар туттараллар.
Виктор Романов этэринэн, кулун тутар бастакы аҥарыттан дьонтон сайаапкалары ылыахтара, онтон тутуу матырыйаалларын тиэрдээһин муус устартан саҕаланыаҕа.
«Маннык көмө Аартыкаҕа кэтэх дьиэлэри тутуу сыанатын лаппа намтатыаҕа. Холобура, Саха Сирин кииниттэн Аартыка улуустарыгар 60 куб матырыйаалы тиэрдии 900 тыһыынча солкуобайга тэҥнэһэр. Ол иһин дьон дьиэ тутталларын ыарырҕаталлар», - диэтэ миниистир.
Олохтоохтору аһынан-үөлүнэн уонна табаарынан хааччыйарга эргиэн-логистика кииннэрэ тутуллаллар. 2025 сылга Баатаҕай Алыытыгар, Өлөөҥҥө уонна Чокурдаахха үс саҥа киин аһыллара былааннанар. Оччотугар, өрөспүүбүлүкэ Аартыкатын 13 улуустара бары таһаҕас тиэйиини хааччыйар кииннэниэхтэрэ.
Орто Халыма улууһугар Бырабыыталыстыба отчуота олунньу 22 күнүгэр диэри буолуоҕа. Үлэлиир бөлөхтөр оройуон 10 нэһилиэгэр сылдьыахтара, олохтоохтору кытта көрсүөхтэрэ уонна социальнай эбийиэктэри көрүөхтэрэ.
Санатан эттэххэ, Саха Сирин ситэриилээх былааһын уорганнарын отчуота олунньу 3 күнүгэр саҕаламмыта уонна кулун тутарга диэри ыытыллыаҕа.
Отчуокка үлэлиир бөлөхтөр кыраапыктарын бу тиһигинэн https://www.sakha.gov.ru/news/front/view/id/3480409 киирэн көрүөххэ сөп.
Иһитиннэрии уонна хаартыска СӨ Ил Дарханын уонна Бырабыыталыстыбатын пресс-сулууспатын саайтыттан.
-
0
-
0
-
0
-
0
-
0
-
0
