Мунньахха 82 киһи кыттыыны ылла, ону таһынан сүүрбэттэн тахса киһи быһа ситиминэн холбонно. Баһылык отчуотун ситэрэн, доруобуйа харыстабылын, үөрэх, тыа хаһаайыстыбатын, култуура улуустааҕы управлениеларын салайааччылара тустаах үлэлэрин-хамнастарын сырдаттылар. Мэлдьи буоларын курдук, нэһилиэк кырдьаҕас олохтоохторо Н.С.Васильев, В.И.Михайлов, А.Е.Большаков инники көрүүлээх этиилэри оҥорон, кулууп дьиэтин саҥардарга, өрөмүөннүүргэ туруорустулар.
Биир дойдулаахтарын, Алексей Елисеевич Кулаковскай-Өксөкүлээх Өлөксөй, 150 сылын көрсө таас култуура киинин тутар, сэлиэнньэ киин уулуссатын аспааллыыр наадатын, саастаах уонна аҥардас дьон сүөһүлэрин түмэн көрөргө анаан биир улахан хотон тутуллара улахан көмө буолуоҕун эттилэр. Амма үс нэһилиэгин хабан, «Ытык Күөл – Дьокуускай» маршрутунан оптуобус сырыыта олохтоноругар болҕомтону туһаайдылар. Оскуола иһинэн интэринээти арыйан, спорду сайыннарар, оскуола өрөмүөнүн, уот барыытыгар сибээс суох буолуутун кыһалҕатын тула санааларын үллэһиннилэр. Улууска улахан суолталаах үлэ ыытылларынан, инники өссө айымньылаах үлэ ыытыллыахтааҕын өйөөннөр, чычымахтар улуус баһылыгын Михаил Соров үлэтин «үчүгэйинэн» сыаналаатылар. Бүгүн баһылык отчуота Ытык Күөлгэ ыытыллар.
-
4
-
0
-
0
-
2
-
0
-
1
