Дьокуускай 202 түөлбэтигэр «Северное сияние» паарка номнуо аһыллан, күн аайы сарсыарда 11 ч. киэһэ 23 ч. диэри үлэлии турар. Киэһэ хараҥаҕа муус оҥоһуктар араас өҥүнэн күлүмүрдүү оонньууллар, киһини ыраахтан угуйаллар.
«Муус оҥоһуктарга «Саха Сирин тыыннаах айылҕата», хаар оҥоһуктарга «Кэм-кэрдии ситимэ» диэн хайысханан ыытыллыбыт күрэххэ иккилии киһилээх 15-тии хамаанда кыттыбыта. Күрэх олунньу 6-11 күннэригэр буолан ааспыта.
Муус оҥоһуктарга I миэстэни Дьокуускайтан Алексей Андреев, Василий Захаров «Туундара баһылыга» диэн оҥоһуктара ылан, 150 000 солк. наҕараадаламмыттара. Оттон хаар оҥоһуктарга Ньурба улууһун Өҥөлдьө нэһилиэгиттэн Герасим Максимов, Дмитрий Максимов «Кырдьык күүһэ» диэн үлэлэрэ бастаабыта. Кинилэр 90 000 солк. ылбыттара.
Быйыл пааркабытыгар араас үрдүктээх 7 сыыр оҥордубут, ону таһынан, бананынан, квадроциклынан, мотоснегоходунан хатааһылатабыт, каток үлэлиир, зорбинг, тюбинг, сылаас кафе баар. Сыырга дьон эчэйбэтин туһугар инструктордар хонтуруоллууллар», — диэн кэпсиир Вилен Старостин, «Северное сияние» паарка администратора.
Халлаан сылыйан, күн уһаан истэҕин аайы муус оҥоһуктар пааркаларыгар дьиэ кэргэнинэн сынньана кэлээччи элбиир. Оҕо аймах дуоһуйа хатааһылаан, таһырдьа сибиэһэй салгыҥҥа араас аралдьыйыыга сылдьан, дьиэлэригэр астынан тиийэллэр.
- 1
- 0
- 0
- 0
- 0
- 0