Билигин дойду үрдүнэн ойуулуктар дьоруойдарын мэтириэттэринэн оҥоһуллубут сымнаҕас оонньуурдарга ирдэбил улаатар. Аны туран, кытайдар оҥорон таһаарбыт сымнаҕас оонньуурдара уонна «чебурашкалар» билигин даҕаны конструкторы баһыйар кыахтара суох эбит. Ол курдук, 2022 сыл түмүгүнэн төрөппүттэр үксүн конструктор оонньуурдары атыыласпыттара биллэр.
- ТОП-5 оонньуурдар көрүҥнэригэр киирэллэр: куукула, дуобат, саахымат, наарда уонна массыына араас көрүҥнэрэ, – диэн маркетинговай хампаанньа чинчийии отделын дириэктэрэ Марина Лучина кэпсээтэ. Чопчу маннык табаардарга наадыйыыны оҕолору саастарынан бөлөххө арааран быһаардылар. Ол курдук, Арассыыйа үрдүнэн билигин 11-тэн 16-гар диэри саастаах оҕо баара биллэр. Балартан 11-15 диэри саастаах оҕолор ордук таптыыр оонньуурдарынан дуобаты, саахыматы, наарданы, конструкторы уонна биисинэс-оонньуурдары ааттаатылар.
- Экэниэмикэҕэ киирбит сааҥсыйалар оскуола инфраструктуратыгар, үөрэх уонна оҕо табаардарын хаачыстыбаларыгар дьайыа суохтаахтар, - диэн сенатор Лилия Гумерова бэлиэтиир, – Хаачыстыбалаах, куттала суох уонна чэпчэки сыаналаах оҕо оонньуурдара эмиэ баар буолуохтаахтар, – диэн кини этэр. Маны таһынан, кини санаатынан, оонньуурдар эбии өссө оҕону иитэр суолталаах ис хоһоонноох буолуохтаахтар.
Мунньах кыттааччылара «оҕолорбутун дойдубут ойуулуктарын дьоруойдарын холобуругар иитэрбит ордук» диэн ыйдылар. Маннык оонньуурдарга олохтоохтор интэриэстэрэ үрдээбитин туһунан «Рамблер» чинчийиитэ эмиэ бигэргэттэ. Ол курдук, хоруйдааччылар 82 %-на олохтоох дьоруойдар көрүҥнэринэн оонньуурдары оҥорон таһаарыыны бары биир киһи курдук өйөөтүлэр.
Дойду ойуулуктарын дьоруойдарынан ырыынак сайдыытын кэскиллээҕин Госдумаҕа уонна Федерация Сэбиэтигэр эмиэ өйүүллэр. «Смешариктар, Маша уонна эһэ, фиксиктар курдук аныгы дьоруойдары оҥорууга күүскэ үлэлэһиэххэ наада, - диэн Госдума Экэниэмикэҕэ бэлиитикэтин кэмитиэтин солбуйааччы Станислав Наумов сабаҕалыыр, — Биһиги оонньуурдарбыт Арассыыйаҕа эрэ буолбакка, тас дойдуларынан уонна аан дойдуга тиийэ ирдэниэхтээх, – диир кини.
Итини сэргэ, Лилия Гумерова этэринэн, ырыынакка ойуулуктар эрэ буолбакка, устуоруйа уонна фольклор дьоруойдара наадалар. Сенатор саҥа идиэйэлэри эрэгийиэннэртэн хомуйан, эмиэ туһунан «бренд» оҥоруохха, атыылыахха сөп диэн сабаҕалыыр:
- Бу биһиги оҕолорбутугар Арассыыйа элбэх национальностаах норуоттааҕын сыаннастарын үрдэтэргэ тирэх буолар, - диэн бэлиэтиир кини.
Холобур, «Саха Сиригэр оҥоһулунна» бренд иһинэн урбаанньыттар бу хамсааһыҥҥа оҥорон таһаарыыны кэҥэтэллэригэр саҥа кыах үөскүүр. Ити курдук, хабылык, хаамыска курдук Cахабыт Сирин остуол оонньууларын, эһиги санааҕытыгар, тас дойдуларга атыылаһыахтара дуо?
Санаттахха, былырыын «Саха Өрөспүүбүлүкэтигэр остуол национальнай оонньууларын сайыннарар аныгы хайысхалар» диэн научнай-практическай кэмпириэнсийэ ыытыллыбыта. Манна мэдэссиинэ билимин дуоктара Ариадна Донская хабылык уонна хаамыска доруобуйаҕа туһалааҕын туһунан научнай үлэ суруйа сылдьарын иһитиннэрбитэ. Кини бу оонньуулары популяризациялыырга сиһилии чинчийэн, туһатын дакаастыыр наадатын ыйбыта.
- 3
- 0
- 0
- 0
- 0
- 0