“Учуутал Павел Николаев-Буоссап Уола” кинигэ “Дани-Алмас” кинигэ кыһатыгар 100 ахсаанынан бэчээттэнэн тахсыбыт. Кинигэҕэ П.А.Николаев докумуоннара, суруктара, кэниспиэктэрэ, хаартыскалара уонна кини туһунан ахтыылар, ыстатыйалар, Национальнай архыып докумуоннарын куопуйалара киирбиттэр. Кинигэ сүрэхтэниитин Амма нэһилиэгин дьаһалтата, А.П.Кулаковская аатынан олохтоох библиотека, “Айылгы” норуот айымньытын дьиэтэ, С.Р.Кулачиков-Эллэй аатынан орто оскуола тэрийдилэр.
Бу тэрээһиҥҥэ Павел Николаев Чөркөөхтөн сиэнэ үлэ бэтэрээнэ, “Октябрьскай нэһилиэк сайдыытыгар кылаатын иһин” бэлиэлээх Наталия Андреевна Грязнухина, хос сиэннэрэ А.П.Черосова, Г.С.Корнилова уонна Н.С.Захаркина, кинилэр оҕолоро, күтүөттэрэ Тыараһаттан кыраайы үөрэтээччи С.Ф.Кладкин, Дьокуускайтан И.И.Шамаев уонна Д.Н.Мосорин кыттыыны ыллылар.
Биһирэм киэһэтэ оскуола аактабай саалатыгар ыытылынна. Амма нэһилиэгин баһылыгын С.С.Соров эҕэрдэ тылыттан уонна биир дойдулааҕын туһунан сырдатыытыттан саҕаланна. Кинигэ тула кэпсэтиигэ П.А.Николаев-Буоссап Уолун удьуордара, күтүөттэрэ, кыраайы үөрэтээччи М.П.Табунанова, педагогическай үлэ бэтэрээннэрэ З.А.Малышева, А.К.Васильева, Т.В.Ефимова, А.Н.Канаева, аймахтарыттан Афанасьевтар, улуустааҕы кыраайы үөрэтэр мусуой салайааччыта М.А.Попова, муниципальнай архыып үлэһитэ М.А.Ефимова уо.д.а.кытыннылар.
Биир интэриэһинэй сырдатыыны Иван Иванович Шамаев оҥордо. Манна даҕатан аҕыннахха, Иван Иванович гражданскай сэрии тиэмэтинэн өссө устудьуоннуур сылларыттан үлүһүйэн дьарыктанарын бэлиэтиир тоҕоостоох. Олохтоох оскуола үөрэнээччилэрэ Амма Аччыгыйын “Сааскы кэм” сэһэниттэн быһа тардыыны көрдөрүүлэрэ, учууталлар ырыалара тэрээһини киэргэттэ.
Кинигэ сүрэхтэниитэ халыҥ аймах бэйэтин көлүөнэтин билсиитинэн буолла уонна Н.Е.Мординов-Амма Аччыгыйа учууталыгар П.А.Николаевка анаабыт “Маҥнайгы учууталбар” ырыанан түмүктэннэ.
-
6
-
0
-
0
-
0
-
0
-
0
