Арай биири сөбүлээбэтим – ынахтар бууттара, ойоҕосторо лаҕыыр саах өлүү буолбуттар. Ону тэлэбидиэнньэ көрдөр да көрдөр, хат-хат... Итини көрбүт тыа сирин үүтүнэн чэйин үүттэнэ олорор куорат мааны хаһаайката хотуолуу сүүрбүт буолуохтаах... Оттон дьиҥэр, ыанньыксыт ынахтарын синньин ыан иннинэ, 4-5 төгүл уутун уларыта сылдьан сууйарын, чахчы ыраас үүтү ыырын билбэттэр.
Үлэ сылыгар маннык үлэһити кэпсиир наада эрээри, судаарыстыбаннай тэлэбидиэнньэ, итинник киһи аҕынньыта төллөр сюжеттарыттан туттунуон сөп этэ. Хотон иһигэр даҕаны үчүгэй көстүүлэри устар ньыма элбэх ини. Холобур, ыанньыксыт ынаҕын моонньуттан кууһан, имэрийэ-томоруйа, үөрэ-көтө сэһэргии турарын уо.д.а. «Саха» НКИХ салалтата биэриибит Бүтүн Арассыыйаҕа, Аан дойду үрдүнэн тарҕанар диэн киэн тутта кэпсиир.
Оччотугар бу биэрии Саха Өрөспүүбүлүкэтин тыатын хаһаайыстыбатын туругун, саха норуотун түһэрэр, намтатар буолбатах дуо?
-
6
-
0
-
0
-
0
-
0
-
0
