Издательский дом Редакция Подписка
Погода в Якутске: . -21 oC

Өлөөн эбэҥки национальнай оройуонун чэбдигирдэр киинигэр сытар кырдьаҕастар Ил Дархан Айсен Николаевка махтаналларын биллэрэллэр.   

Өлөөн эбэҥки национальнай оройуонун чэбдигирдэр киинигэр сытар кырдьаҕастар Ил Дархан Айсен Николаевка махтаналларын биллэрэллэр.   

Мин бу тэрилтэҕэ үлэлээбитим икки сыл буолла, диир эмтиир физкултуура инструктора Саргылаана Матвеева. Дьон доруобуйатын чөлүгэр түһэрэр тэрилтэ аан маҥнай Өлөөҥҥө баара, онтон Харыйалаахха саҥа балыыһа тутуллан киирбитигэр, эргэ балыыһаны чэбдигирдэр киин оҥорбуттара. Салайааччынан 2010 сылтан Сардаана Егоровна Степанова үлэлиир, биир быраас, икки медсиэстэрэ, үс санитарка, икки асчыт, биир ис-тас үлэһит, биир таҥас сууйааччы, биир завхоз, биир психолог үлэлиибит. Быйылгы сылга 160 киһини хабыахтаахпыт. Чуолаан, инбэлииттэри, бэтэрээннэри, анал байыаннай дьайыыга сылдьар дьон төрөппүттэрин, кыаммат дьону киллэрэн көрөбүт-истэбит. Күҥҥэ түөртэ аһыыллар, нэһилиэк иһигэр тардыллыбыт оптоволокно ситиминэн 4G сибээс хабыллар, дьарыктанарга спортивнай инвентарь баар. Биир “заездка” уон киһини киллэрэбит, бу сырыыга Дьэлиҥдэ, Өлөөн нэһилиэктэриттэн бааллар. Кэлэр сырыыга эмиэ ыраах нэһилиэктэртэн хабыахпыт, суол сабыллыыта Харыйалаахтан ылыахпыт.

Чэбдигирдэр кииҥҥэ билигин Анна Павлова, Мария Павлова, Елена Спиридонова кэргэнэ Валерий Лгановтуун, Ольга уонна Иван Николаевтар  уоллара Ньургуннуун, кинилэр бырааттара Степан Николаев, Өлөөнтөн Вера Протопопова сытан эмтэнэллэр эбит. Көрсүһүүгэ кинилэр  бэйэлэрин олохторун, төрөөбүт дойдуларын киэн тутта кэпсээтилэр. Арассыыйа Президенэ Владимир Путин ыытар бэлиитикэтин сөбүлүүллэрин эттилэр. Улуус баһылыга Лена Иванова үлэлиир хайысхатын биһирииллэрин биллэрдилэр, бэйэлэрин кыыстарынан, Ил Түмэн дьокутаата Елена Голомареванан киэн тутталларын, быйылгы быыбарга хайаан да кини туһугар куоластарын биэриэхтэрин туһунан эттилэр.

Өлөөн_--_2.jpg

Эдэр сылдьан көс табаһыт олохтоох Анна Павлова маннык сэһэргээтэ:

-- Мин кэргэним тыа хаһаайыстыбатын үтүөлээх үлэһитэ А.П.Павлов 14 сааһыттан ыстаадаҕа үлэлээбитэ, бастаан бостуук этэ, онтон өр сылларга, олохтон барыар диэри «Дьэлиҥдэ” сопхуос 4 №-дээх ыстаадатыгар биригэдьиирдээбитэ. Икки уолум ыстаадаҕа үлэлииллэр. Иннокентий аҕатын оннугар биригэдьиирдиир, Александр – табаһыт. Табаһыт олоҕо олус ыарахан. Хата, оройуоммут баһылыгынан үлэлээбит Александр Иванов баар эрдэҕинэ базаларыгар сылаас дьиэни туппуттара, көскө бардылар да, ол дьиэ балаакка буолар. Аһылыктарыгар хаһаайыстыба да, оройуон да көмөлөһөн улаханнык абырыыр. Ааспыт ыйга Бырабыыталыстыбата отчуота кэлэ сырыттаҕына, уолаттарым ыстаадаларыгар “Буран” туруорсубутум. Тоҕо диэтэххэ, биэс бостуукка биир “Бураннаахтара” олус эргэрдэ. Аҕабыт баарыгар Гранынан ылбыта. Билэргит курдук, тиэхиньикэ эргэрдэ да, оттугу сиирэ улаатар, элбэхтик алдьанар.

Өлөөн_--_4.jpg

-- Биһиги, кырдьаҕастар Ил Дархан Айсен Николаевка махтанабыт. Маннык ыраах хоту сиргэ олорор ыарахан, ол да буоллар Арктика сайдыытыгар туһуламмыт бырагыраамалар көмөлөрүнэн олохпут сайдар. Бу сайдыы биһиги сиэннэрбит олохторун чэпчэтиэ диэн үөрэбит. Айсен Сергеевич Ил Түмэн дьокутаатынан аан бастаан биһиги оройуоммутуттан талыллан, билигин өрөспүүбүлүкэни салайар Ил Дархан буолбута. Онон, биһиги кининэн киэн туттабыт. Оччолорго да өйөөбүппүт, билигин даҕаны кини ыытар бэлиитикэтин толору өйүүбүт уонна биһириибит, – диэтэ сааһын тухары фтизиатр-бырааһынан үлэлээбит Мария Павлова.

Уһук Хотугу дойдуга олорор сэргэх кэпсээннээх эбэҥки кырдьаҕастарын кытары  көрсүһүүм бу курдук түмүктэннэ. Барахсаттарга, үчүгэй доруобуйаны, этэҥҥэ буолууну баҕарабын.

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением