Уопсастыба

Дария Болтокова оскуолаҕа үөрэммит кэмнэрин ахтан-санаан, кинини начальнай кылааска үөрэппит, Саха Өрөспүүбүлүкэтин үтүөлээх учуутала, Учууталлар учууталлара, Үөһээ Бүлүү улууһун бочуоттаах олохтооҕо Мария Дмитриева, Балаҕаннаах ситэтэ суох оскуолатыгар өр кэмҥэ дириэктэринэн үлэлээбит Саха Өрөспүүбүлүкэтин үөрэҕин туйгуна, Балаҕаннаах нэһилиэгин бочуоттаах олохтооҕо Лидия Васильева, Саха Өрөспүүбүлүкэтин үөрэҕин туйгуна Галина Жендринская, Нам орто оскуолатыгар уһун кэмҥэ дириэктэрдээбит, учууталлаабыт, Балаҕаннаах нэһилиэгин баһылыгынан үлэлээбит, муниципальнай сулууспа туйгуна, Саха Өрөспүүбүлүкэтин үөрэҕин туйгуна, нэһилиэк бочуоттаах олохтооҕо Иван Харитонов, Нам, Балаҕаннаах оскуолаларыгар учууталынан үлэлээбит Саха Өрөспүүбүлүкэтин үөрэҕириитин туйгуна Федора Харитонова итии-истиҥ тылларынан эҕэрдэлээтилэр. Нэһилиэк дьаһалтатын баһылыга Степан Дмитриев эҕэрдэ сурук, сертификат туттарда.

Балаҕаннаах агро-хайысхалаах оскуолатын дириэктэрэ, Саха Өрөспүүбүлүкэтин үөрэҕириитин туйгуна Степан Жендринскэй махтал суругу, Балаҕаннаах агро-хайысхалаах оскуолатын үлэһиттэрэ сылгы сиэлиттэн оҥорбут олбохторун Дария Болтокова ыраах Канадаҕа олорон төрөөбүт-үөскээбит Балаҕаннааҕын өйдүү-саныы сылдьарыгар анаан туттарда. Дария Болтокова кыра кылаастан саҕалаан хайдах үөрэммитин, Үөһээ Бүлүү гимназиятын үрүҥ көмүс мэтээлинэн бүтэрэн, Санкт-Петербурга судаарыстыбаннай сулууспа академиятыгар үөрэнэн магистр идэтин ылбытын, салгыы Британскай Колумбия университетын бүтэрэн баран, дуоктар диссертациятын көмүскээбитин туһунан кэпсээтэ.

Оскуола оҕолоро олус болҕомтолоохтук иһиттилэр, ыйытыктары биэрдилэр. Көрсүһүүнү Балаҕаннаах оскуолатын дириэктэрин иитэр үлэҕэ солбуйааччы, Саха Өрөспүүбүлүкэтин үөрэҕин туйгуна, нэһилиэк бочуоттаах олохтооҕо Ольга Ботуева иилээн-саҕалаан ыытта.
Балаҕаннаах нэһилиэгиттэн төрүттээх аҕыс наука билимин дуоктардара, олор истэригэр медицина науатын дуоктардара, Балаҕаннаах нэһилиэгин бочуоттаах олохтоохторо Ахмед Варфоломеев, Рево Алексеев бааллар. Билиҥҥи көлүөнэ ыччаттартан биир бастыҥнара, харахпыт далыгар улааппыт, үөрэммит Дария Болтокова ийэтэ Светлана Леонтьевна уонна учууталлара үөрэтэн-такайан, сүбэ-ама биэрэн көмөлүспүттэрин ылынан, салгыы үөрэнэн, антропология философиятын дуоктарын аатын омук сиригэр, англия тылынан көмүскээн ылбытынан, Балаҕаннаах дьоно-сэргэтэ киэн туттабыт!!! Киниэхэ үлэтигэр өссө үрдүк ситиһиилэри, дьиэ кэргэнигэр бигэ туруктаах доруобуйаны, дьолу-соргуну баҕарабыт!!!