Чугас ходуһалаах, үчүгэй суоллаах-иистээх хаһаайыстыбалар отторун тута кыбыыларыгар таһан иһэллэр, ыраах сирдээхтэр миэстэтигэр кэбиһэллэр биитэр рулуоннууллар.
-- От ыйын 11 күнүнэҕи чахчынан, 2 083 туонна от чөкөтүлүннэ, былырыын баччаларга 1 737 туонна кэбиһиилээх этибит. Инники күөҥҥэ Уус Алдан улууһа (415 т.), Нам (385 т.) уонна Амма (297 т.) иһэллэр. Үгүс улууска үүнүү куһаҕана суох буоллаҕына, Эбээн Бытантайга уонна Кэбээйигэ балаһыанньа бөрүкүтэ суох. Мин бу күннэргэ Кэбээйи улууһугар баран кэллим, Кэбээйи уонна Сииттэ нэһилиэктэрин сүрүн ходуһалара, Турбаахы ууга сытар, кыралаан түһэр. Онон хаһаайыстыбалар илиилэринэн оттуу сылдьаллар, 135 туоннаны чөкөттүлэр. Улуус дьаһалтата былырыын мотуордаах хотууру атыылаһыы ороскуотун 50 %-ын уйуммута, быйыл эмиэ итинник өйөбүлү оҥорор, – диэн иһитиннэрдэ Тыа хаһаайыстыбатын министиэристибэтин сиртэн үүнээйини ылыыга уонна материальнай-тиэхиньиичэскэй хааччыйыыга департаменын салайааччытын солбуйааччы Василий Бессонов.
Тыа хаһаайыстыбатын сирдэрин көдьүүстээхтик туһаныыга итиэннэ мелиорация комплексын сайыннарыыга туһуламмыт судаарыстыбаннай бырагыраама чэрчитинэн, быйыл 100 мөл. солк. тыырыллан, куонкурус быһыытынан 35 хаһаайыстыбаҕа көрүллэр буолла (ааспыт өттүгэр маннык өйөбүл суоҕа). Бу үпкэ тирэҕирэн, анал тиэхиньикэлэри атыылаһаннар, хаһаайыстыбалар хоруу хорон ходуһалартан ууну түһэриэхтэрэ, кураанныыр кутталлаах сирдээхтэр нүөлсүтүүгэ үлэлиэхтэрэ. Ити сүөһү аһылыгын бэлэмнээһиҥҥэ сүдү төһүү буолуоҕа.
-
1
-
0
-
0
-
0
-
0
-
0
