Ол эрээри, Бүлүү улуустарыгар балаһыанньа кэнникинэн уустугуран барда, маҥнай нэдиэлэҕэ биирдэ ардаан ааһар халлаан олох да биирдии эрэ күн курааран баран, иккилии-үстүү күннээх ардахтарынан солбуллан барда. Эмиэ былырыыҥҥы хартыына хатыланыах курдук чинчилэннэ, былырыыҥҥы ардахтартан уонна кыһыҥҥы халыҥ хаартан тот сытар ходуһалар кыра да ардахха «бычалыс» гына түһэллэр.
Өрөспүүбүлүкэҕэ ойуур баһаардара эмиэ көбөн таҕыстылар диэн буолла, ол эрээри, бу баһаардар бэс ыйыттан бааллар, ол ону билигин, от үлэтин үгэнигэр, кэлэн оҥоруу (искусственнай) ардаҕы баһаары умулуннарар сыаллаах аҕалан, от үлэтин атахтааһын баар суол. Дьиҥинэн, ойуур баһаарын ииппэккэ, ыйыллыбыт төһө эрэ гектарыгар тириэрдибэккэ, эрдэ дьаһайыахха наада, маны тустаах үлэлээхтэр болҕомтоҕо ылан сөптөөх дьаһалы, быһаарыныыны ылар кэмнэрэ уолдьаста курдук. Мантан салгыы айылҕабыт бэйэтин ардахтара кэлиэхтэрэ турар, онно ити оҥоруу ардах эбилиннэҕинэ, олох да иэдэйэбит. Төһө да олох сайдан, айылҕаны салайар турукка киирбит иннигэр, айылҕа бэйэтэ туспа сокуоннаах, ону утары барар табыллыбата буолуо. Онон итиннэ күүстээх болҕомтону ууран, кыстыкка бэлэмнэнэр үлэлэри атахтаппат гына дьаһанар ордук этэ.
-
0
-
0
-
0
-
1
-
0
-
0
