Бу тэрээһин сопхуос саҕана сыллата ыытыллар буолан, оччолорго баһаар туруута аҕыйах этэ. Өртөөһүн кыһалҕатын мин мээнэ таарыйбатым, ол аата ыраах сирдэрбитин өртүүр буоллубут да, онно сылгы таһаарыытын кыайыахтаахпыт, сылгы базаларын тэрийиэхтээхпит, ону таһынан дьону таһааран, оттооһуну тэрийиэхтээхпит.
Тыа таһаайыстыбатын улуустааҕы управлениетыгар үлэлии сылдьан, МТС салайааччытын, билигин биһиги ортобутугар суох Егоров Леонид Васильевиһы кытары кэпсэтэммин, ону кини ылынан, МТС-тар Өргүөт нэһилиэгэр сопхуос саҕана оҥоһуллубут, быраҕыллан сытар, сайын тиэхиньикэ тиийбэт сиригэр сааскы суолу өрүсүһэ тыраахтары уонна оттугу-уматыгы таһааран, сайын кур лаҥха да буоллар, 270 туонна оту оттооннор, отторо тиийбэт ыаллары хааччыйбыттара. Ол оту тиэйии-таһыы ороскуотун Тыа хаһаайыстыбатын министиэристибэтэ уйуммута.
Өрөспүүбүлүкэ үрдүнэн элбэх сир быраҕыллан сытар. Онон, Тыа хаһаайыстыбатын министиэристибэтэ мелиорация салаатыгар (салайааччы Дмитрий Махаров) үгүөрү үбүлээһини көрөн, ыраах сытар сирдэри туһаҕа таһаарар этэрээттэри тэрийтэрэн, күөх маассаны ыһыыны, сылгыны бөһүөлэктэртэн таһаарыыны итиэннэ ууга барбыт сирдэр ууларын түһэриини тэрийтэрэр туһунан судаарыстыбаннай бырагыраама оҥоһуллуохтаах. Ол өрөспүүбүлүкэни аһынан-үөлүнэн хааччыйыы тосхолун чэрчитинэн барыахтаах.
Билигин сэбиэскэй былаас эргиллибэтэ өйдөнөр эрээри, үлэҕэ-хамнаска сэбиэскэйдии сыһыан наада. Нэһилиэктэргэ боломуочуйа бэриллэн, үүт субсидиятыттан саҕалаан, күрүө тутуутун, сир оҥоруутун уо.д.а. курдук тыа хаһаайыстыбатыгар сыһыаннаах хайысхаларга үбүлээһин көрүллэр эрэ түгэнигэр, нэһилиэктэргэ ходуһаларга тиийэр суоллары оҥоруу, сайылыктааһын боппуруостара быһаарыллан, кэлэр өттүгэр сүөһү-сылгы ахсаана аҕыйыыр, эстэр кутталын туоратар тэрээһиннэри олохтуур кыаллыаҕа.
Степан Дмитриев, Балаҕаннаах нэһилиэгин баһылыга. Үөһээ Бүлүү улууһа.
-
0
-
0
-
0
-
0
-
0
-
0
