Былырыыҥҥы халаан уутун уонна кыһыҥҥы халыҥ хаар содулларыгар кэккэ улуустар былааннарын ырааҕынан толорбот туруктаахтара, ол эрээри, күн-дьыл этэҥҥэ туран биэрэн, кыраапыктан хаалсыбатылар. Бүлүү улууһун дьаһалтата мелиорация үлэтин күүһүрдэн, 11 нэһилиэккэ ходуһалартан ууну түһэрии үлэтин тэрийэн, оттооһун харгыһа суох ыытылларын хааччыйда -- 24 137 туонна оттонон, былаан 90 % толорулунна. Арыылаах уонна Баппаҕаайы нэһилиэктэрэ сорудахтарын куоһардылар. Билигин да үлэ тохтообот, мантан хаалбыт күннэргэ мобильнай биригээдэлэр ыраах учаастактарга эбии оттуу сылдьаллар.
Кэбээйи улууһугар ходуһалартан ууну түһэрэр үлэ эмиэ төһө кыалларынан тэриллэн итиэннэ ааспыт ыйга улаханнык ардаабакка, 9 730 туонна от оттоммут, бу тиэрдиллибит былаан 91,6 %-а. Билигин да ходуһа 30 %-а ууга сытар, бу ыйга курааннаатаҕына, онтон сороҕо босхолонуон сөп. Үүнүү орто эрээри былырыыҥҥы уһун, дохсун ардахтар тэбиилэригэр ыраах учаастактарга барар суол-иис алдьаммыта оттооһун хаамыытын бытаардыбыт.
9 421 туоннаны оттуур былааннаах Дьааҥы улууһун хаһаайыстыбалара окко киириигэ сирдэрин-уоттарын көрүнэн бараннар, кыстыыр оппут 80 %-ын булуннахпытына махтал буолсу диэн сабаҕалаабыттара. Ол эрээри, ити барыллаабыттарын куоһаран олороллор – 7 748 туонна оту кэбиһэн, былааннарын 82 % толордулар. Хоту дойду хоһууннара билигин да хотуурдарын ыһыктар санаалара суох, ходуһаларга 154 звено, ол иһигэр үс ситэтэ суох мэхэньисээссийэлээх, 152 илиинэн оттуур звено, барыта 358 киһи оттуу сылдьаллар. Үлэ сылынан үлэ дьонун көҕүлээн, «Полюс холода» кэпэрэтиип сайын устатыгар үс төгүл төхтүрүйэн «Күүлэй» тэрийдэ.
Мобильнайдар – 12 758 туоннаны
Тиийбэт оту хааччынар туһуттан ыраах сытар учаастактарга оттуур мобильнай биригээдэлэр тэриллэллэр. Билиҥҥи туругунан, тоҕус улууска 151 мобильнай биригээдэ тэриллэн, 12 758 туонна от бэлэмнэннэ.
Чурапчы улууһугар 30 мобильнай биригээдэ тэриллэн, 2 366 туоннаны оттообуттар. Бу курдук, Амма улууһугар 24 мобильнай биригээдэ 3 227 туоннаны, Бүлүү улууһугар 20 мобильнай биригээдэ 2 643 туоннаны, Горнай улууһугар 55 мобильнай биригээдэ 1 915 туоннаны, Таатта улууһугар 10 мобильнай биригээдэ 1 360 туоннаны, Кэбээйи улууһугар 6 мобильнай биригээдэ 520 туоннаны, Орто Халыма улууһугар биир мобильнай биригээдэ 30 туоннаны оттообуттар.
Бу күннэргэ эбии 19 мобильнай биригээдэ тэриллэр үлэлии сылдьар, өрөспүүбүлүкэ үрдүнэн барыта 170 мобильнай биригээдэни тэрийэргэ сайаапка түһэриллибитэ. Дьэ бу биригээдэлэр холбоон 15 991 туоннаны оттуур сорудахтаахтар. Тыа хаһаайыстыбатын министиэристибэтэ бу хайысханан, сүөһү дорохой аһылыгын саппаас пуондатын тэрийии чэрчитинэн, 14 мөл. 454 тыһ. солкуобай харчыны көрөр буолла, билигин ол сөбүлэһиигэ сылдьар.
-
0
-
0
-
0
-
0
-
0
-
0
