Сүрүн тэрээһиннэр балаҕан ыйын 8-10 күннэригэр киин куоракка биэс былаһаакканан буолаллар: Кырдьаҕас куоракка, Култуура уонна сынньалаҥ пааркатыгар, Орджоникидзе болуосатыгар, Кыайыы болуоссатыгар итиэннэ Карл Маркс аатынан искибиэргэ.
Бүгүн сарсыарда халлаан төһө да күһүҥҥүлүү тымныы, тыаллаах, ол быыһыгар ардахтаах буоллар, Орджоникидзе болуоссатыгар уонна Кыайыы болуосатыгар уопсастыбаннай аһылык тэрилтэлэрин уонна олохтоох табаары оҥорооччулар дьаарбаҥкалара бэрт сэргэхтик барда, көрөөччү үгүс, атыылаһааччы да оччо буолла.
Кыайыы болуоссатыгар сарсыардаттан эргиэн тэрилтэлэрэ араас табаар, оҕо оонньуурун, кинигэтин уо.д.а. атыытын тэрийдилэр. Роман Дмитриев аатынан набережнай икки өттүнэн ас-үөл быыстапка-атыыта тэрилиннэ.
«Плов-киинэ» тэрилтэ оҕуруот аһын, сып-сылаас плову, 5 №-дээх аһылык кэмбинээтэ бурдук ас арааһын, биирдэм урбаанньыттар үтэһэлээх эти тардан кэбистилэр. Дьэ бу буоллаҕа «Вкусноград» диэн аһылык бэстибээлэ!
Белинскэй аатынан библиотека кэлэктиибэ быйыл да бэрт элбэх дьаһаллары тэрийэн ыытта: кэлбит дьоннор, эгэ, оҕолор дуо, викториналарга, квест-оонньууларга, сахалыы остуол ооньууларыгар көхтөөхтүк кытыннылар. Бириис ылан үөрдүлэр.
Сылын ахсын куорат олохтоохторугар кинигэ бэлэхтиир үгэһин библиотека быйыл да кэспэтэ: «Читай-город» павильонугар тардыллыбыт кинигэ арааһыгар киһи тииспэт үлүгэрэ буолла!
-
2
-
0
-
0
-
0
-
1
-
0
