Уопсастыба

Улуустартан ийэлэр, байыаннай чаастартан хантарааҕынан сулууспалыыр уолаттар батсаабынан суруйан, төлөпүөннээн араас боппуруоһунан тахсыбыттара. “Кыраныыссаҕа турабыт, сарсын киирэбит”, -- диэн иһитиннэриилэри ыыппыттара. Кулун тутар бүтүүтэ чаастарга сырыттахпына, эчэйбит байыастар кэлитэлээбиттэрэ. Муус устарга “Боотур” түмсүү байыастара барбыттара, кинилэргэ куулунан ис таҥас, наскы биэрэн ыыппыппыт. Кулун тутарга Саллааттар уонна мотуруостар төрөппүттэрин өрөспүүбүлүкэтээҕи кэмитиэтэ уонна “Саха сирин ийэлэрин сойууһа”, “Арассыыйа ийэлэрэ” өрөспүүбүлүкэ ийэлэриттэн хомуйан, икки байыаннай сөмөлүөтүнэн баһыылка  ыыппыппыт, ону кэлин уоппускаҕа кэлбит байыастар туппуттарын кэпсээбиттэрэ. Бэс ыйыттан госпиталларга сырыыны саҕалаабыппыт. Ол куораттарга баар бастайааннай бэрэстэбиитэлистибэлэри кытыннаран, от ыйыттан доброволецтары уонна баҕа өттүлэринэн үлэлии барар быраастары атаартаабыппыт. Атырдьах ыйыгар Аина Храмова Москваттан эрийэн, госпиталларга сытар  уолаттарга көмөлөһүөхтэрин баҕаралларын биллэрбитэ, дьэ онтон саҕаламмыта “Саха волонтердара” хамсааһын үлэтэ.

Балаҕан ыйын 21 күнүттэн мобилизация биллэриллибитэ. Ити күн биһиги Евгения  Михайлова, Анжелика  Андреева буоламмыт, Баһылыкка сурук суруйбуппут. Балаҕан ыйын 23 күнүгэр Ирина Саввинаны, Гульнара Алексееваны кытары  “Якутия с тобой” диэн штаб үлэтин саҕалаабыппыт. Онно Уопсастыбаннай Палататтан Николай Бугаев, волонтердар Айыллаан Винокуров, Айыл Дьулурҕа үлэлэспиттэрэ. Бастаан нэһилиэнньэ спальнай мешок, сылаас таҥас, ас-үөл, эмп-том аҕалан саҕалаабыта, онтон Бырабыыталыстыба уонна Ил Дархан өйөбүллэринэн улахан хамсааһын тахсыбыта. Алтынньы 2 күнүгэр  Хаҥаласка мобилизацияламмыттары атаарар сиргэ алгыстаах Сэргэни туруорбуппут, уолаттар этэҥҥэ эргиллэллэрин туһугар Алгыс оҥорбуппут. Алтынньы 3 күнүттэн байыаннай чаастарга (Хабаровскайга, Улан Удэҕэ, Читаҕа, Уссурийскайга, Владивостокка, Сергеевкаҕа, Сибирцевоҕа, хас да улахан полигоҥҥа) сылдьан мобилизацияламмыт байыастары көрсөн, алҕаан, харысхал биэрэн, алаадьы амсатан, атаартаабыппыт. Сэтинньигэ Ростовка тиийэн, онтон Мариополь куораты аһары баран, 114 полканы көрсүбүппүт, волонтер Герасим Парниковтыын сылаас таҥас, спальнай мешок, араас  наадалаах тэриллэри туттарбыппыт, ол кэмҥэ Өлүөхүмэ баһылыга онно көмөлөһөр пууҥҥа урут Өлүөхүмэҕэ үлэлии сылдьыбыт Саранцев диэн киһини сыһыарбыт этэ. Вера Душкевич тиийэн үлэтин саҕалаан эрэрэ. Доруобуйа харыстабылын министиэристибэтиттэн быраастар биригээдэлэрэ тиийэн үлэлии сылдьалларыттан Светлана  Давыдованы көрсөн, уолаттарга быһаччы көмөлөһө сылдьарын истибиппит. Оҕотун сүтэрбит биир ийэ кэлэн тугу да ситиспэккэ, ким да көмөлөспөккө хомойон аҕай төннүбүт этэ. Госпитальга сылдьан саллааттары көрсөн, маҕаһыынтан ас-таҥас ылан тиэрдибитим.

Ити кэмтэн ыла ол диэки аҕыс төгүл  тиийэ сылдьан, госпиталь бөҕөҕө сылдьан, эчэйбит байыастары кытары сирэй көрсөн, күн бүгүнүгэр диэри  сибээстэһэ сылдьабыт. Күн ахсын уонтан тахса киһи ватсаабынан суруйан биитэр төлөпүөннээн көмө көрдөһөллөрүн сүбэлээн-амалаан, ыйан-кэрдэн биэрэбит. Бу кэм устата Алдаҥҥа, Нерюнгрига, Өймөкөөҥҥө, Томпоҕо, Тааттаҕа, Мэҥэ Хаҥаласка, Хаҥаласка, Намҥа, Эбээн Бытантайга, Тиксиигэ, Горнайга, Үөһээ Бүлүүгэ, Ньурбаҕа, Сунтаарга сылдьан саллааттар төрөппүттэрин, кэргэттэрин кытары  көрүстүбүт, сүбэлэстибит-амаластыбыт. Ыксаллаах кэмҥэ киһиэхэ үтүө тыл, кыра да көмө элбэҕи этэр, уоскутар, көмөлөһөр.

Өрүүтүн көмөлөһөр дьоммутугар: Евгения Исаевна Михайловаҕа, Петр Витальевич Шамаевка, Лука Митрофанович Егоровка, Анатолий Лукич Никифоровка, Лөкөй От Туол Уйга, Георгий Николаевич Михайловка, Анатолий Аскалонович Семеновка, Ким Александровичка, бииргэ үлэлиир баар суох дьоммор: Зинаида Михайловна Антипинаҕа, Наталья Спиридоновна Поповаҕа, Мария Алексеевна Башиноваҕа,  Мария Алексеевна Степановаҕа, сиэннэрбэр, оҕолорбор ийэлии Барҕа Махталбын этэбин. Эһиги баар буолаҥҥыт бары көмөлөөн, инники кирбиигэ сылдьар уолаттарбытыгар Эрэли тиэрдэбит. Уолаттарбыт бары кыайыы көтөллөнөн дойдуларыгар кэлэллэрин күүтэбит. Күүстээх үлэ салҕанар!