Төрүт олохтоох аҕыйах ахсааннаах хотугу омуктар өрөспүүбүлүкэтээҕи ассоциацияларын бэрэсидьиэнэ Андрей Кривошапкин сийиэс быйыл, ахсынньыга ыытылларын, онно Сибиир уонна Уһук Илин төрүт олохтоох аҕыйах ахсааннаах хотугу омуктарын ассоциацията, федеральнай уонна өрөспүүбүлүкэтээҕи былаас уорганнара, уон үс Аартыкатааҕы улуустар бэрэстэбиитэллэрэ кытталларын туһунан иһитиннэрдэ. Сийиэскэ национальностар дьыалаларыгар федеральнай ааҕыныстыба көһө сылдьар сэминээрэ, төрүт олохтоох аҕыйах ахсааннаах хотугу омуктар эдэр суруйааччыларын сүбэ мунньаҕа, төгүрүк остуоллар тэриллэллэрэ былааннанар. “Туундара уонна тайҕа дуораана” диэн ырыа куонкуруһунан кыайылаахтарын уонна лауреаттарын улахан кэнсиэрдэ буолуоҕа.
Сүбэ мунньах кыттыылаахтара «Саха Өрөспүүбүлүкэтин Аартыкатааҕы зонатын уонна төрүт олохтоох хотугу омуктарын сайыннарыы» судаарыстыбаннай бырагыраама “Төрүт олохтоох аҕыйах ахсааннаах хотугу омуктар төрүт дьарыктарын уонна олохторун илгэтин харыстааһын” хос бырагырааматын үбүлээһини сөргүтэр наадатын тоһоҕолоон бэлиэтээтилэр. Ону таһынан Ассоциация төрүт олохтоох аҕыйах ахсааннаах хотугу омуктар түөлбэлээн олорор сирдэригэр үлэлиир промышленнай хампаанньалары кытары бииргэ үлэлээһинин күүһүрдэргэ, Москубаҕа “Сокровище Севера” аан дойдутааҕы быыстапка-дьаарбаҥканы тэрийэргэ итиэннэ тутулла турар Эпос уонна ускуустуба Аартыкатааҕы киинигэр Төрүт олохтоох аҕыйах ахсааннаах хотугу омуктар судаарыстыбаннай тыйаатырдарын киллэрэргэ эттилэр.
Андрей Кривошапкин төрүт олохтоох аҕыйах ахсааннаах хотугу омуктар култуураларын, тылларын, төрүт дьарыктарын, олохторун укулаатын сайыннарыыга, харыстааһыҥҥа ахсаабыт кыһамныларын иһин Ассоциация аатыттан Ил Дархан Айсен Николаевка, Бырабыыталыстыбаҕа уонна Ольга Балабкинаҕа тус бэйэтигэр махталын биллэрдэ.
Мария Васильева (ЯСИА) хаартыскаҕа түһэриитэ
-
0
-
0
-
0
-
0
-
0
-
0
