Ол туһунан докумуон нуормаламмыт быраап аакталарын барылларын порталыгар балаҕан ыйын 9 күнүгэр тахсыбыт. Уларытыылар барыллара билигин хоруупсуйаны утары хонтуруолга уонна уопсастыбаннай дьүүллэһиигэ сылдьар. Бигэргэнэр түбэлтэтигэр, истипиэндийэ кээмэйэ бу сыл балаҕан ыйыттан 10 000 солкуобайтан 15 000 солкуобайга диэри үрдэтиллэн бэриллиэҕэ. Маны таһынан Арассыыйа судаарыстыбаннай, уопсастыбаннай диэйэтэлэ, этнограф учуонай, нанаай чулуу кыыһа Евдокия Гаер (1934-2019) аатынан истипиэндийэни олохтуур туһунан кэпсэтии ыытыллар.
Төрүт олохтоох аҕыйах ахсааннаах омуктартан анал үөрэхтээх исписэлиистэри бэлэмнээһиҥҥэ эбии дьаһаллар өйөнүөх тустаахтар. Кинилэр тылларын-өстөрүн уонна култуураларын харыстааһын улахан суолталаах. Эбии истипиэндийэ бэриллэрэ ыччаттар ийэ тылларын уонна төрүт култуураларын үөрэтэллэригэр көҕүлүүрэ саарбахтаммат.
Иккис өттүттэн, ааспыт өттүгэр көрүллэ сылдьан баран тохтотуллубут өйөбүл көрүҥнэрин сөргүтэр көдьүүстээх. Ол курдук, 2006-2016 сс. федеральнай үрдүк үөрэх кыһаларыгар үөрэнэр төрүт олохтоох, аҕыйах ахсааннаах хотугу омуктар ыччаттара таҥас-сап, сымнаҕас тэрил ылыналларыгар анаан, ыйга 13 000 солк. суумалаах социальнай төлөбүр көрүллэр этэ. Бу туһунан Аартыканы сайыннарыы уонна хотугу омуктар дьыалаларын министиэристибэтин саайта суруйар.
-
1
-
0
-
0
-
0
-
0
-
0
