Ааспыт өрөбүлгэ Кирбэй нэһилиэгин күн күбэй ийэлэрэ ким тугу аҕаларын эрдэттэн сүбэлэһэн баран, Сынньалаҥ киинигэр түмсэн блиндажка туттар чүмэчилэри оҥордулар. Дьиэлэриттэн гааһынан умайар билиитэ оһоҕу, гаас боллуонун, чүмэчи, хордуон кумааҕы, иччитэх бааҥка уонна чүмэчини уулларар иһит-хомуос аҕалынан, барыта 40 устуука блиндаж чүмэчитин оҥордулар.
“Арчы”, “Кирбэй кийииттэрэ”, “Дьүөгэ”, “Ийэ мичээрэ” түмсүүлэрин, дьахтар сүбэтин уонна эдэр ыччат “Алакуо” түмсүүтүн кыттыылаахтара кэлбиттэриттэн киһи сүргэтэ көтөҕүллэр.
Анал байыаннай дьайыыга сылдьар байыас ийэтэ Розалия Прокопьевна Константинова, аҕа саастаах эдьиийбит Елена Константиновна Христофорова эдэрдэргэ холобур буолан, ханнык баҕарар тэрээһиннэргэ өрүү бастакынан кытталлар, үтүө сүбэһит буолаллар. Түөлбэ салайааччылара олохтоохтору көҕүлүүллэр.
Бу курдук биир сүбэнэн өрүү түмсүүлээх буоллахха, хайа баҕар кыһалҕа быһаарыллан иһиэҕэ, ыарахан да чэпчииргэ дылы буолуоҕа. Анал байыаннай дьайыыга сылдьар эр хоһууттарбытыгар илиилэрин сылааһын иҥэрэн көмө-тирэх буолар эдэр ийэлэргэ, дьүөгэлэргэ, эбээлэргэ махталбытын биллэрэбит. Тумуу тумуннун, дьаҥ дьалты аастын, бука бары этэҥҥэ эрэ буолуоххайыҥ!
- 1
- 0
- 0
- 0
- 0
- 0