Ыам ыйын 20 күнүттэн өрөспүүбүлүкэҕэ эрэгийиэн суолталаах ыксаллаах быһыы-майгы эрэсиимэ биллэриллибитэ. Нам улууһугар халаан уутуттан биэс нэһилиэк ордук эмсэҕэлээтэ, дьон олорор дьиэтин-уотун, үлэ эбийиэктэрин, ол иһигэр иитэр-үөрэтэр тэрилтэлэр дьиэлэрин уу ылла. Маймаҕаҕа оскуола-саад, Хатырыкка уһуйаан уонна оскуола, Көбөкөҥҥө уһуйаан, Фрунзеҕа уһуйаан дьиэлэрэ ууга олороллор. Үөрэх уонна билим министиэристэбэтэ хоромньуну ааҕыыны саҕалаата, чөлүгэр түһэрэр кэлим үлэ ол чахчытынан оҥоһуллуохтаах.
--Ураты болҕомто ууга барбыт дьиэлээх ыаллар оҕолоругар ууруллуоҕа, кинилэр сайыҥҥы лааҕырдарга, ол иһигэр “Бэс чагда” кииҥҥэ уонна Наукалар дьоҕус академияларыгар, сынньаныахтара, доруобуйаларын туругун бөҕөргөтүөхтэрэ. Булгуччулаах судаарыстыбаннай эксээмэни уонна Биир кэлим судаарыстыбаннай эксээмэни туттарыы кыраапык быһыытынан ыытыллыаҕа, -- диэтэ Анатолий Семенов.
Улуустааҕы үөрэх управлениетын салайааччы Мария Игнатьева иһитиннэрбитинэн, халаантан эмсэҕэлээбит нэһилиэктэр оҕолоро бастакы эксээмэннэрин бүгүн Хамаҕатта оскуолатыгар, ыам ыйын 23 күнүгэр Нам 1 №-дээх орто оскуолатыгар туттарар эбиттэр.
-
0
-
0
-
0
-
0
-
0
-
0
