Бу бэлиэ даата саха алпаабытын тѳрүттээбит саха бастакы лингвист-учуонайа, саха тылынан тахсыбыт бастакы учуобунньуктар ааптардара, тѳрѳѳбүт сахатын тылын чинчийиигэ, сайыннарыыга олоҕун анаабыт Семен Андреевич Новгородов тѳрѳѳбүт күнүгэр сѳп түбэhиннэриллибитэ. Бу ааспыт 30 сыл устатыгар Төрөөбүт тыл уонна сурук-бичик күнүн көрсө хас сыл ахсын анал дэкээдэ биллэриллэн, өрөспүүбүлүкэ үрдүнэн ийэ тылга анаммыт араас дьаһаллар тэриллэн ыытыллаллара үтүө үгэскэ кубулуйда. Ол курдук, иитэр-үөрэтэр кыһаларга анал уруоктар, кылаас чаастара, хоһоону ааҕыыга куонкурустар, тыл үөрэхтээхтэрин уонна суруйааччылары кытары көрсүһүүлэр, быыстапкалар, дьыктаан суруйуулара тэриллэллэр.
Уус Алдан улууһугар В.В. Алексеев аатынан Мүрүтээҕи уолаттар гимназияларыгар “Саргылаах сахам саҥата” диэн Ийэ тыл нэдиэлэтэ буола турар. Нэдиэлэ чэрчитинэн тэриллэр араас дьаһалларга оҕолор көхтөөхтүк кытталлар.
Бэҕэһээ "Сахалыы саҥарыах" диэн ураты өй оонньуута буолла. Бу тэрээһин гимназия учууталларыгар анаан ыытылынна. Өй оонньуутун сүрүн сыала — төрөөбүт тыл баайын, кэрэтин өссө төгүл арыйыы, идэлээх үлэһиттэр сахалыы саҥарар, толкуйдуур дьоҕурдарын байытыы буолар. Оонньууга учууталлар сахалыы тыллары, өс хоһооннорун, ырыалары таайдылар.
Түмүккэ кыттааччылар сахабыт тылын харыстыырга, сайыннарарга ыҥырдылар. Тэрээһин олус көхтөөхтүк ааста, кыттыылаахтар сүргэлэрэ көтөҕүлүннэ.
Сахабыт тыла — үйэлээх баайбыт, кини өрүү чэлгийэ сайда туруохтун!
Р. Андросова, педагог-библиотекарь.
Хаартысканы ааптар ыытта.
-
0
-
0
-
0
-
0
-
0
-
0
