Былыт саппыт былыргы кэмтэн Баһылай Манчаары күүһүгэр холонор бииртэн биир быыппастар былчыҥнаах бөҕө-таҕа дьоммут, күүстээҕинэн сураҕырбыт үтүө дьоммут ааттара үйэлэрэ уҥуордаан ааттана тураллар. Кэм- кэрдии саҕаҕа арылларын тэҥэ, саҥа кэм күүстээхтэрэ оонньууларга түһүлгэлээн мустан, саҥаттан саҥа ааттары ааттаталлар. Маннык үтүө түһүлгэ аны биир сылынан Ытык Күөлгэ ыытыллыаҕа. Онно бэлэмнэнэн таатталар “Манчаары оонньууларын” таблотун кыһыл уотун үөрүүлээхтик уматтылар.
Ытык Күөл киин болуоссатыгар оҕо-аймах, спортсменнар, олохтоохтор кыттыылаах тэрээһиҥҥэ Таатта улууһун баһылыга Айаал Бурцев маннык эттэ:
--Бүгүн саха Олимпиадатыгар тэҥнээх улахан оонньуулар таблоларын уотун умата муһуннубут. Оруобуна биир сылынан бу күн 8 чааска XXII “Манчаары оонньууларын” факела умайыаҕа. Күнтэн күн бу сыыппара биһигини оонньууларга угуйа, элбэҕи ситиһэргэ, кыайыыга-хотууга сирдиэҕэ. Хас биирдиибит өрө турунан, тэрэһиннээхтик оонньулары ыытыахтаахпыт диэн бэйэбитигэр кыаҕы үөскэтиэхтээхпит.
Таатта нэһилиэгин баһылыга Егор Павлов: “Оонньуулары көрсө элбэх үлэ ыытыллар, ыытыллыаҕа. Суолу оҥоруу үлэтэ саҕаланна, ону тэҥэ саҥа объектарбыт тутуулара күннэтэ ыытылла турар. Хас биирдии күн улахан суолталаах тэрээһиҥҥэ бэлэмнэниини мэктиэлии туруоҕа”, -- диэтэ.
Табло уотун баһылыктар Айаал Бурцев, Егор Павлов уонна мас рестлиҥҥа Арассыыйа, Саха сирин, “Спортивные якутяне” спартакиада кыайыылааҕа Айтал Винокуров уматтылар.
Бу курдук күнтэн күн табло уота умайан, XXII “Манчаары оонньуулара” Саха Сирин норуоттарын спартакиадатыгар сирдиэҕэ.
-
1
-
0
-
0
-
0
-
0
-
0
