Уопсастыба

Сүҥкэн суолталаах бырагыраама

Арассыыйа Федерациятын Хотугу, Сибиир уонна Уһук Илиҥҥи төрүт олохтох омуктарын ассоциацията уонна Тас дойдулар дьыалаларын министиэристибэтин иһинэн үлэлиир Норуоттар икки ардыларынааҕы сыһыаннаһыыларга судаарыстыбаннай институт Аҕыйах ахсааннаах төрүт олохтоох омуктары өйүүр пуонданы, «Нориль Никелэ» хампаанньаны кыттыһыннаран, 2022 сыллаахха «Арассыыйа аҕыйах ахсааннаах төрүт олохтоох омуктара. Уопсастыбаннай дипломатия оскуолата» диэн Бүтүн Арассыыйатааҕы үөрэх бырагырааматын бырайыагын олоххо киллэрбиттэрэ. Былааһы уонна биисинэһи кытары бииргэ үлэлээн, норуоттарын интэриэстэрин туруулаһар ыччаттары, саҥа көлүөнэ лиидэрдэрин иитэн-үөрэтэн таһаарар, үлэни-хамнаһы тэрийэр бырайыактары көҕүлүүр, хардарыта уопут атастаһыннарар соруктаах үөрэх сыллата үс түһүмэҕинэн ыытыллар.

Быйылгы дьарык бастакы түһүмэҕэ муус устар ыйга онлайн киэбинэн буолбута. Иккис түһүмэх Дьокуускайга бу нэдиэлэҕэ, чопчулаан эттэххэ, атырдьах ыйын 4 күнүттэн саҕалаан, атырдьах ыйын 10 күннэригэр диэри ыытыллар. Онно кыттыыны ыла Уопсастыбаннай дипломатия оскуолатын бырагыраамаларга дириэктэрэ Алексей Цыкарев, Национальностар дьыаларыгар федеральнай ааҕыныстыба эппиэттээх үлэһиттэрэ уонна Сахалинтан саҕалаан Ямал-Ненец аптаныамынай уокуругар тиийэ 15 эрэгийиэнтэн төрүт олохтоох омуктар бэрэстэбиитэллэрэ (бастакы түһүмэх 29 полуфиналиһа) кэллилэр.
Кинилэр Саха Өрөспүүбүлүкэтигэр судаарыстыбаннай национальнай бэлиитикэ хайдах ыытылларын, төрүт олохтоох хотугу омуктар тылларын-өстөрүн, култуураларын уонна хаһаайыстыбаннай дьарыктарын араҥаччылааһыҥҥа, салгыы сайыннарыыга өйөбүл ханнык көрүҥнэрэ баалларын, бырамыысаланнай хампаанньалары кытары үлэ хайдах ыытылларын билсэллэр. Онон өрөспүүбүлүкэ тустаах биэдэмистибэлэрин, Хотугу аҕыйах ахсааннаах төрүт олохтоох омуктарын ассоциациятын салайааччыларын, актыбыыстарын кытары көрсөллөр, араас дискуссионнай былаһааккаларга, маастар-кылаастарга, тиэмэлэринэн көрсүһүүлэргэ үлэлииллэр, бэйэлэрин бырайыактарын билиһиннэрэллэр. Итиэннэ, биллэн турар, киин куорат кэрэ-бэлиэ сирдэринэн, мусуойдарынан экскурсияларга сылдьаллар. Иккис түһүмэх үлэтин түмүгүнэн финалга тахсыбыттар кэлэр ыйга Москубаҕа ыытыллар былаас федеральнай уорганнарын үлэлэрин-хамнастарын билиһиннэрэр үһүс түһүмэххэ көрсөллөрө былааннанар.

Бэҕэһээ, атырдьах ыйын 5 күнүгэр, күнүстэн киэһэ Бырабыыталыстыба 2 №-дээх дьиэтин аактабай саалатыгар «Аҕыйах ахсааннаах төрүт олохтоох хотугу омуктар бырааптарын сокуонунан мэктиэлээһин уонна Саха Өрөспүүбүлүкэтин холобуругар сокуону оҥорууга чорботуллар хайысхалар» диэн тиэмэҕэ «төгүрүк остуол» тэрилиннэ. Ону Ил Түмэн Хотугу аҕыйах ахсааннаах төрүт олохтоох омуктар боппуруостарыгар уонна Аартыка дьыалаларыгар сис кэмитиэтин бэрэссэдээтэлэ Елена Голомарева иилээн-саҕалаан ыытта.

Ол туһунан сиһилии «Ил Түмэн» хаһыакка ааҕыаххыт.

Хаартыскалар Ил Түмэн саайтыттан уонна куйаар ситимиттэн ылылыннылар.