Аһымал аахсыйата
Балаҕан ыйын 18 күнүгэр ыыппыт сүбэ мунньаҕар Александр Подголов Дьокуускай куораттааҕы Кэлим сүрүннүүр киин Суһал ыстааба Донбааска көмө уонна өйөбүл Хотугулуу-Илиҥҥи пуондатын кытары кыттыһан, Саха Өрөспүүбүлүкэтин күнүн чэрчитинэн, «Норуот уонна аармыйа бииргэлэр» диэн өрөспүүбүлүкэтээҕи аһымал аахсыйатын тэрийэллэрин туһунан иһитиннэрбитэ.
– Аахсыйаҕа кыттыы баҕа өттүнэн, «бачча-оччо харчыны биэрэҕит» диэн ким да кими да күһэйбэт, онон ким төһөнү кыайарынан биэриэн сөп. Хомуллубут тэриллэринэн баһыылка оҥоһуллан, өрөспүүбүлүкэтээҕи Кэлим сүрүннүүр киин бэрэстэбиитэллэринэн Анал байыаннай дьайыыга сылдьар биир дойдулаахтарбытыгар тиэрдиллиэҕэ, – диэбитэ норуот дьокутаата.
Аһымал аахсыйатынан Анал байыаннай дьайыыга сылдьар байыастарга анаан баһыылка тэрийэргэ үп хомуйуллар. Баһыылкаҕа бохуот усулуобуйатыгар күннэтэ туттуллар тэриллэр киирэллэр: суумка, хахха буолар сабыы, Хатастааҕы агрооскуола оҥорор сублимированнай (итии ууга уган суурайыллар) собо миинэ, атах спрейэ, жгут, хаан барыытын тохтотор губка, водород перекиһэ, бандаж, рулоннаах лейкопластырь уо.д.а.
1620 баһыылка барда
Ханнык баҕарар дьаһал толорулларынан күүстээх. «Норуот уонна аармыйа бииргэлэр» аһымал аахсыйатын чэрчитинэн, бастакы 1 620 устуука баһыылка балаҕан ыйын 27 күнүгэр, Саха Өрөспүүбүлүкэтин күнүгэр, ыытыллыбыта. Билигин тустаахтарынан тиксэриллэ сылдьар.
Аһымал аахсыйата сэтинньи 4 күнүгэр, Сомоҕолоһуу күнүгэр, диэри ыытыллар. Онон Кэлим сүрүннүүр киин Суһал ыстааба киин куорат эрэ буолбакка, өрөспүүбүлүкэ олохтоохторун бу үтүө хамсааһыҥҥа көхтөөхтүк кыттан, бэйэлэрин сэмэй көмөлөрүн киллэрэллэригэр ыҥырар.
Дьиэ кэргэттэргэ кыһамньы
Анал байыаннай дьайыыга сылдьар байыастарга уонна кинилэр дьиэ кэргэттэригэр көмө бары хайысханан тэриллэр. Ол туһунан Бырабыыталыстыба Бэрэссэдээтэлин солбуйааччы Георгий Степанов брифиҥҥэ маннык кэпсээтэ:
– Балаҕан ыйын 30 күнүнээҕи туругунан, Анал байыаннай дьайыыга сылдьар оҕолордоох 448 төрөппүт сонотуоруйдарга уонна куруортарга эмтэнэр путевканан туһаннылар, 340 байыас салгыы эмтэнэ барарыгар итиэннэ 141 ыал дьиэтигэр «күөх төлөнү» киллэриигэ матырыйаалынай көмө оҥоһулунна. Барыта 847 байыас уонна байыаннай сулууспалаахтар дьиэ кэргэттэрэ (1 514 киһи) доруобуйа харыстабылын итиэннэ социальнай эйгэ тэрилтэлэригэр доруобуйаларын туругун чэбдигиртилэр.
АБДьга сылдьар аҕалаах оҕолорго көмө, байыаннай сулууспалаах ханна олороруттан тутулуга суох, көрүллэр. Ол курдук, 6-ларыттан 18-гар диэри саастаах оҕолорго өрөспүүбүлүкэ иһигэр сынньанар путевка бэриллэр. Оскуола иннинээҕи саастаах кырачааннар уһуйаан төлөбүрүттэн босхолоноллор, оскуолаҕа олорор сиринэн ылыыга, көһөрүүгэ ураты быраабынан туһаналлар, босхо «итии» аһылыгынан хааччыллаллар, куруһуоктарга уонна успуорт сиэксийэлэригэр бастакынан суруллаллар, дьарыктанааччыларга пуорма бэриллэр. Анал орто уонна үрдүк үөрэх кыһаларыгар үөрэнэр ыччаттарга өйөбүл эмиэ баар: тус сыалынан үөрэххэ киирэр дуогабары түһэрсиигэ уонна судаарыстыба бүддьүөтүттэн истипиэндийэни олохтооһуҥҥа кинилэр чорботуллаллар.
Миитин-кэнсиэр
2022 с. балаҕан ыйын 30 күнүгэр ыытыллыбыт референдум түмүгүнэн, Донецкай уонна Луганскай норуодунай өрөспүүбүлүкэлэр, Запорожье уонна Херсон уобаластара Арассыыйа Федерациятын састаабыгар, кини субъектарын быһыытынан, киирэллэрин туһунан дуогабарга илии баттаммыта. Бу даата икки сылын туолбутун бэлиэтиир «Биһиги бииргэбит!» диэн бырааһынньыктааҕы миитиннэр нэдиэлэ бастакы күнүгэр дойду 89 эрэгийиэнигэр ыытылыннылар.
Саха Өрөспүүбүлүкэтин олохтоохторо ити хамсааһынтан туора турбатылар, иитэр-үөрэтэр тэрилтэлэргэ анал кылаас чаастара, түмэллэргэ быыстапкалар, АБДь кыттыылаахтарын кытары көрсүһүүлэр тэрилиннилэр. Дьокуускайга, Орджоникидзе аатынан болуоссакка миитин-кэнсиэр ыытылынна.
– Бүгүн биһиги түөрт эригийиэн Арассыыйаны, бэйэлэрин төрүт дойдуларын кытары холбоспутун бэлиэтии муһуннубут. Донецкай, Луганскай норуодунай өрөспүүбүлүкэлэр, Запорожье, Херсон уобаластарын олохтоохторо нууччаны абааһы көрүүнү, фашизмы тулуйар кыахтарыттан тахсыбыттара, бэйэлэрин ийэ тылларыттан, култуураларыттан, үйэлээх үгэстэриттэн аккаастаныахтарын баҕарбатахтара. Биһиги ытык иэспит – кинилэри өйөөһүн. Түөрт саҥа субьект холбоһуутун суолтата улахан, манна дьыала сири-уоту кэҥэтиигэ эрэ буолбакка, дьон дьылҕатын туһугар кыһамньыга сытар. Биһиги бэйэбит дьоммутун бырахпаппыт. Билигин биһиги биир дойдулаахтарбыт Анал байыаннай дьайыыга Ийэ дойдубут кэскилин көмүскүүллэр. Маннык тэрээһиннэринэн, миитиннэринэн биһиги кыайыыга эрэлбитин бигэргэтэбит. Кыайыы биһиэнэ буолуоҕа! — диэтэ норуот дьокутаата Александр Подголов.
– Бу түөрт эрэгийиэн тутулуга суох буолалларын, сирдэрэ-уоттара үллэһиллибэтин туһугар кыргыһа сылдьар буойуннарбытын биһиги бары өйүүбүт. Норуоппут түмсүүлээҕин, биир сомоҕотун көрдөрөммүт, «Биһиги бииргэбит!» диибит, – диэтэ Арассыыйа Дьоруойа, СӨ Ыччат дьыалатыгар уонна социальнай алтыһыыга миниистирин эбээһинэһин толороочу Игорь Юргин.
Даҕатан эттэххэ, Игорь Юргин балаҕан ыйын 23 күнүттэн Ил Түмэҥҥэ стажировкаланан, парламент үлэтин-хамнаһын билсибитэ. Ил Түмэн байыаннай сулууспалаахтар, бойобуой дьайыылар кыттыылаахтарын дьыалаларыгар, патриотическай иитии уонна уопсастыбаннай тэрилтэлэр боппуруостарыгар сис кэмитиэтин мунньаҕар үлэлээбитэ. Ону таһынан, Саха Өрөспүүбүлүкэтигэр настаабынньыктааһын үнүстүүтүн сайыннарыы сокуонугар этиилэри киллэрэр оробуочай бөлөх сүбэ мунньаҕар кыттыбыта.
Миитиҥҥэ буолбут кэнсиэргэ «Ямская гармонь» ырыа ансаамбыла, «Туймаада» судаарыстыбаннай ырыа амсаамбыла кытыннылар. Болуоссакка мустубут дьоннор Арассыыйа былааҕын уруһуйун күөнүгэр саҥа эрэгийиэннэр хаарталарын оҥордулар, ыччаттар дойду эрэгийиэннэрин ахсаанынан «89» сыыппараны флешмобунан көрдөрдүлэр.
Хаартыскаҕа Мария Васильева (ЯСИА) түһэриитэ
-
0
-
0
-
0
-
0
-
0
-
0
