Истиҥ бэлиэ тэрээһиҥҥэ саха национальнай гимназиятын саха тылын, литературатын учуутала Галина Семеновна Анисимова уонна кини 9 “а” кылааһын үөрэнээччилэрэ, ХИФУ устудьуоннара уо.д.а. ыалдьыттар кыттыыны ыллылар. Мария Сергеевна эбэтин Акулина Николаевнаттан саҕалаан, күн күбэй ийэтин сырдык мөссүөнүн көрөөччүлэр иннилэригэр бэрт истиҥник билиһиннэрэн кэпсээтэ. Маны таһынан, кини ХИФУ уһуйааччытын быһыытынан оскуола үөрэнээччилэригэр туһаайан үнүбэрситиэт туһунан кылгастык билиһиннэрдэ.
Оҕолор интэриэһиргээбит боппуруостарын тута биэрэн хоруйу ыллылар. Тэрээһин бүтүүтэ ыалдьыттар Мария Сергеевна кэрэхсэбиллээх сэһэнин иһин махтал бастыҥын анаатылар уонна саҥа турбут быыстапканы көрөннөр астыннылар-дуоһуйдулар. Биир эриэккэс чахчы: 1934 с. нуучча аатырбыт киинэ режиссера Александр Довженко “Аэроград” диэн киинэни устарыгар Сардаананы – суулаах кыһыл оҕону киинэ дьоруойун кэргэнэ оҕолонон олорор хартыынатыгар устубут эбит.
Түмэл аатыттан киниэхэ сэмэй бэлэх туттарылынна. Салгыы оҕолорго анаан “Ойуун эйгэтигэр” диэн квест-оонньуу ыытылынна. Манна кинилэр икки хамаандаҕа арахсан оонньоотулар. Оҕолор оонньуу кэмигэр суруйааччылар мэтириэттэригэр ааттарын сөпкө туруорууну олус кэрэхсээтилэр. Үөрэнээччилэргэ көхтөөх кыттыыларын иһин бириис бэрилиннэ.
Иһирэх тылынан
Бэлиэтээн эттэххэ, балаҕан ыйын 6 күнүгэр, Сардаана Платоновна төрөөбүтэ 90 сылын туолбута. Онуоха аналлаах тэрээһин Литература түмэлигэр буолан ааспыта.
Тэрээһиҥҥэ СӨ култууратын миниистирэ Афанасий Ноев кыттыбыта. Норуодунай суруйааччылар Николай Лугинов, Наталья Харлампьева истиҥ ахтыы оҥорбуттара. Үлэлээбит үнүстүүтүттэн тыл билимин хандьыдаата Лидия Романова учуонай киэҥ хабааннаах үлэтин туһунан сиһилии кэпсээбитэ. Ойуунускай аатынан Саха тыйаатырын артыыстара Зоя Багынанова, Матрена Седельникова, Аида Еремеева, Юлия Санникова Платон Ойуунускай хоһооннорун ааҕан сэргэхсиппиттэрэ.
“Ойуунускай Сардааната” быыстапкаҕа Сардаана Платоновна кинигэлэрэ, хаартыскалара, наҕараадалара, Платон Алексеевичка аналлаах тэрээһиннэр ыҥырыыларын, ол тэрээһиннэр тустарынан ыстатыйалары кырыйан, сыһыаран оҥорбут альбома, дьон бэлэхтэрэ бар дьон көрүүтүгэр таҕыстылар.
Алтынньы 20 күнүгэр П.А. Ойуунускай аатын сүгэр Саха академическай тыйаатырыгар Сардаана Платоновна Ойунская төрөөбүтэ 90 сылыгар аналлаах үбүлүөйдээх киэһэтэ ыытыллыаҕа.
Хаартыска П.А.Ойуунускай аатынан Литература түмэлиттэн
-
0
-
0
-
0
-
0
-
0
-
0
