Учуутал күнэ дойдуга аан бастаан 1965 сыл балаҕан ыйын 29 күнүгэр бэлиэтэммитэ, оччолорго бу бырааһынньык алтынньы бастакы өрөбүлүгэр олохтоммута. 1966 сыл алтынньы 5 күнүгэр ыытыллыбыт учуутал статуһун туһунан бырабыыталыстыба анал кэмпириэнсийэтэ Учуутал аан дойдутааҕы күнүн олохтуурга төрүөт буолбута. 1994 сылтан биһиги Учуутал күнүн алтынньы 5 күнүттэн бэлиэтибит.
Быйыл Арассыыйаҕа Дьиэ кэргэн, Саха Өрөспүүбүлүкэтигэр Оҕо аймах сыллара. Дьиэ кэргэн уонна оҕо аймах оскуоланы кытары ыкса ситимнээхтэр. Киһи оҕо сааһын көмүс күннэрэ оскуолаҕа ааһаллар, оскуола үгүс сабыытыйалара дьиэ кэргэн күннээҕи олоҕун кытары алтыһаллар. Онон бэйэтин уратытынан уонна социальнай хайысхатынан оскуола, уопсастыба үнүстүүтүн быһыытынан, дьиэ кэргэни эмиэ иитэр. Төрөппүттэр оҕолорун бэйэлэрин учууталларыгар үөрэттэрэ аҕалар түбэлтэлэрэ элбэх. Бу Учуутал сыралаах үлэтигэр дириҥ ытыктабыл, кини аналын билинии буолар. Үөрэнээччилэрин дьоҕурдарын, талааннарын арыйан, кинилэргэ олоххо олус наадалаах билиини, сатабылы-үөрүйэҕи иҥэрэн, учууталлар дойду кэскилин оҥороллор.
Учуутал күнэ хас биирдии киһиэхэ ураты истиҥ-иһирэх, сылаастан сылаас иэйиини үөскэтэр. Төһө эмит элбэх сыл ааспытын иннигэр, биһиги бэйэбит оскуолаҕа үөрэммит учууталларбыт, олоххо сирдээбит настаабынньыктарбыт олохпутун түстээбит билиини, духуобунай сыаннастары иҥэрбит муударай сүбэлэрин-амаларын умнубаппыт, кинилэр сырдык-ыраас сэбэрэлэрин сүрэхпитигэр илдьэ сылдьабыт.
Күндү учууталлар! Бүгүҥҥү үөрүүлээх бырааһынньыгынан эһиэхэ баҕарабын үлэҕитигэр өссө үрдүк ситиһиилэри, чэгиэн-чэбдик доруобуйаны, дьолу-соргуну, табыллыыны, бигэ туруктаах олоҕу. Учуутал үлэтин түмүгэ диэн идэлээх куонкурустарга кыайыы эрэ буолбатах, бу – бастатан туран, эһиги үөрэнээччилэргит ситиһиилэрэ. Биһиги улуу Ийэ дойдубут, Арассыыйа уонна Саха Өрөспүүбүлүкэтин, кэлэр кэскилэ кинилэр илиилэригэр.
Истиҥ эҕэрдэни кытары Ил Түмэн Бэрэссэдээтэлэ Алексей Еремеев
- 1
- 0
- 0
- 0
- 0
- 0