Бүгүҥҥү үөрүүлээх үтүө күнүнэн, үтүөҕэ-кэрэҕэ, билиигэ сирдиир Учуутал күнүнэн, бэйэлэрин учууталларын норуот дьокутааттара эҕэрдэлииллэр.
Оскуола, учуутал улахан сабыдыаллаахтар
– Мин Нам улууһун I Хомустаах оскуолатыгар үөрэммитим. Билии эйгэтигэр Анна Гаврильевна Харлампьева сиэтэн киллэрбитэ. Үс сыл устата бэркэ кыһанан ааҕарга-суруйарга, суоттуурга үөрэппитэ, алын оскуоланы бүтэртэрбитэ. Төрдүстэн ыла кылааспытын Елена Ивановна Неустроева салайбыта, араас биридимиэттэринэн элбэх учууталлар үөрэппиттэрэ. Холобур, историяҕа уонна алын байыаннай бэлэмнэниигэ Федор Иванович Новгородов үөрэппитэ.
Чахчыта даҕаны, киһи олоҕун суола хайдах салалларыгар, туох идэни талан, хайдах үлэһит буоларыгар оскуола уонна учууталлар улахан сабыдыаллаахтар. Учууталларым барахсаттары мин олус күндүтүк саныыбын, махтана ахтабын. Учуутал күнүнэн бары иитэр-үөрэтэр үлэһиттэри итиитик-истиҥник эҕэрдэлиибин, ситиһиилээх үлэни баҕарабын.
Александр Атласов, Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ
Дириҥник өйдүүбүн, сүгүрүйэбин
– Үүнэр көлүөнэ ыччаппытын күннэтэ үөрэтэ, иитэ сылдьар күндү учууталлары уонна педагогическай үлэ бэтэрээннэрин Учуутал күнүнэн итиитик-истиҥник эҕэрдэлиибин! Ханнык да идэлээх, дуоһунастаах киһи барыта учуутал илиитин нөҥүө бу олоххо кынат үүннэринэн көтөр, үйэтин тухары киниэхэ махтанар.
Хас биирдии киһиэхэ ордук истиҥник саныыр-ахтар учууталлардаах буолар. Мин билигин чуолаан махтал тылларын этэбин нуучча тылын үөрэппит, кылааһым салайааччытыгар Марфа Дмитриевна Поповаҕа, физкултуураны үөрэппит Александр Сергеевич Николаевка, саха тылын учууталыгар Матрёна Львовна Варламоваҕа, учуутал идэтин ылан саҥа үлэлии кэлбиппэр настаабынньыктаабыт Тамара Алексеевна Сергучёваҕа, дириэктэрбэр Николай Иванович Шариҥҥа.
Уон сылы быһа сырдыкка угуйбут, ааҕарга-суруйарга үөрэппит учууталларбар барыларыгар махтанабын! Ийэм, кэргэним, бэйэм, кыыһым, балтыларбыт учуутал идэлээх буоламмыт, бу идэ суолтатын олус дириҥник өйдүүбүн, сүгүрүйэбин.
Андрей Находкин, Ил Түмэн Сир сыһыаннаһыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ
-
2
-
0
-
0
-
0
-
0
-
0
