“Көмүлүөк” кулууп тэриллиэҕиттэн өрөспүүбүлүкэтээҕи, Арассыыйа уонна аан дойду таһымнаах араас куонкурустарга сахалыы ырыа-тойук, үҥкүү, хомус, иис-уус бары көрүҥнэринэн ситиһиилээхтик кыттан кэллэ. Бэтэрээннэр араас аахсыйалартан туора турбаттар, Анал байыаннай дьайыыга сылдьар байыастарга көмөлөһөр хамсааһыҥҥа көхтөөхтүк үлэлииллэр-хамсыыллар.
Бастакы Бэрэсидьиэн Михаил Николаев сэтинньи 19 күнүн Саха сиригэр нуучча тылын күнүнэн олохтуур туһунан 2001 с. таһаарбыт ыйааҕын чэрчитинэн, кулууп сэтинньи 19 күнүгэр “Тээйэ” банкеттыыр саалатыгар хоһоон куонкуруһун тэрийэн ыытта. Кулууп чилиэннэрэ бары XIX үйэтээҕи нуучча норуотун таҥаһын-сабын кэтэн киэргэнэн-киэркэйэн кэлэн, ол кэминээҕи турукка киирэн туран, нууччалыы хоһооннору аахтылар, ырыа ыллаан эйээртилэр. Бу кэрэ-бэлиэ күнү умнуллубаттыы бэлиэтээн сүргэлэрэ көтөҕүллэн, астынан тарҕастылар. Күүстээх жюри сыанабылынан кыайыылаахтар дипломунан, сыаналаах бириистэринэн наҕараадаланнылар.
Хоһоон-ырыа толоруутугар: бастакы миэстэ -- РФ үөрэҕириитин бочуоттах үлэһитэ Мария Соловьева, иккис миэстэ -- Саха Өрөспүүбүлүкэтин бочуоттаах бэтэрээнэ Елизавета Захарова, үһүс миэстэ – оскуола иннинээҕи иитэр үлэҕэ өрөспүүбүлүкэ бочуоттаах үлэһитэ Евдокия Петрова. Таҥас-сап күрэҕэр: бастакы миэстэ -- Саха Өрөспүүбүлүкэтин үөрэҕириитин туйгуна Альбина Дмитриева, иккис миэстэ -- Саха Өрөспүүбүлүкэтин үөрэҕириитин туйгуна Анна Михайлова, үһүс миэстэ -- Саха Өрөспүүбүлүкэтин үөрэҕириитин туйгуна Ирина Сухонина буоллулар. Кыттыылаахтарга барыларыгар сэртипикээттэр, бириистэр тутарылыннылар. Дьоро киэһэ минньигэс астаах сандалы тула ырыанан түмүктэннэ.
Инникитин даҕаны былаан элбэх, үлэ үгүс, дьарык да дэлэгэй. Бэтэрээннэр өссө да араас өрүттээх үлэлэргэ, ыҥырыыларга кыттарга бэлэмнэр. Кинилэргэ ыстаал доруобуйаны уонна элбэх ситиһиилэри баҕарыаҕыҥ.
Фатима ВЕРХОВЦЕВА, култуура туйгуна, “Кыраасданнары патриоттуу иитии иһин” бэлиэ хаһаайката.
Ааптар хаартыскаҕа түһэриитэ.
-
3
-
1
-
0
-
0
-
0
-
0
