Уопсастыба

Күрэхтэһии аһыллыытыгар «Таатта» түмсүү» салайааччыта Владимир Аржаков маннык тэрээһиннэри түмсүү өйүүрүн, көмөлөһөрүн уонна сыл саҕаланыыта бастакы күрэхтэрин, быйыл Тааттаҕа ыытыллар «Манчаары оонньууларыгар» аныыбыт диэн эттэ уонна тэрийээччи Сардаана Сыромятниковаҕа, Матрена Архаковаҕа Эҕэрдэ суруктары, өйдөбүнньүк бэлэхтэри туттарда.
Остуол тенниһин күрэхтэһиитэ хас биирдии кыттааччыттан элбэҕи эрэйэр. Дэлэҕэ да, бу спорт көрүҥэ Аан дойду сайдыылаах омуктарын умсугутан, Олимпиадаҕа күөн көрүһүннэриэ дуо? Теннискэ оонньооһуҥа өй-санаа тобуллуута, кыраҕы харах, түргэн хамсаныы, чыпчылҕан түгэнэ толкуй -- бу барыта сайдан, баар буолан кыайыыга тиэрдэрин хас биирдии теннисчит билэр. Онон, дьарыктанар, умсугуйар эрэ киһи ылсар буоллаҕа.

Таатта остуол тенниһэ сайдыбыт сирэ. Тыараһаттан Назар Турнин, Дьохсоҕонтон Любовь Саввина, Чөркөөхтөн Светлана Слепцова уо.д.а. тэлбит суолларынан элбэх теннисчиттэр иитиллэн тахсыбыттара. Билигин Назар Турнин кыыһа Валентина Антипина уо.д.а. тренердэр оҕолору эрчийэн, бэлэмнээн ааттарын-суолларын өрөспүүбүлүкэҕэ ааттаттылар.

Салайааччы, спорт бэтэрээнэ, тенниһинэн дьарыктанар Иннокентий Андросов «Таатта» түмсүүнү салайа сылдьыбыт кэмнэригэр теннис спордун өрө тутара, араас күрэхтэһиилэри тэрийэрэ. Кэлиҥҥи сылларга симэлийэ сылдьыбыт спорт биир көрүҥүн, хата, теннисчит кыргыттар Сардаана Сыромятникова уонна Матрена Аржакова саҥаттан сөргүтэн, сэргэх күрэхтэһиини тэрийдилэр, биир дойдулаахтарын түмтүлэр.
Күрэхтэһии сааһынан араарыллан ыытылынна.

Эрийсиилээх, тыҥааһыннаах киирсии кэнниттэн түмүк маннык таҕыста:
35 саастарыгар диэри кэрэ аҥардарга: 1 миэстэ – Римма Турнина  (Кыйы), 2 миэстэ -- Туйаара Семенова (Кыйы), 3 миэстэ – Наталья Афанасьева (Чычымах);
36 саастарыттан үөһээ: 1 м. – Анна Ефимова (Кыйы), 2 м. – Матрена Аржакова (Чөркөөх), 3 м. -- Надежда Капитонова (Чөркөөх).

35 саастарыгар диэри эр дьоҥҥо: 1 м. – Иннокентий Толстяков (Кыйы), 2 м. -- Спартак Христофоров (Баайаҕа), 3 м. – Мичил Боппосов (Уолба).
36-50 саастаахтарга: 1 м. – Игорь Сыромятников (Туора Күөл), 2 м. -- Альберт Алексеев (Ытык Күөл), 3 м. – Михиал Алексеев (Чөркөөх).
51-тэн аҕа саастаахтарга: 1 м. – Вячеслав Данилов (Чөркөөх), 2 м. – Николай Борисов (Чөркөөх), 3 м. – Иннокентий Андросов (Баайаҕа).

«Күрэхтэһии муҥутуур кыайыылааҕа» аатын ылар иһин эрийсиилээх киирсиигэ Михаил Алексеев хотто уонна Саха Өрөспүүбүлүкэтин Үрдүкү Суутун бэрэссэдээтэлэ, Ытык Күөлтэн төрүттээх Любовь Летучих супербириискэ 10. 000 солк. туруорбут сэртипикээтин ылла.
Иккис супербириис киирии билиэтинэн оонньоммутугар Римма Турнина билиэтин күрэхтэһии кылаабынай судьуйата Сахая Карпова тардан таһаарда. Уус Амма, Амма нэһилиэктэриттэн төрүттээх Үрдүкү Суут судьуйата Иннокентий Посельский туруорбут бирииһин ылла.
«Кэскиллээх оонньооччу» аатынан Таппыров Иван (Кыйы), «Кыайыыга дьулуурун иһин» аатынан Ефремов Артур (Чөркөөх) бэлиэтэннилэр. Кыайыылаатры эҕэрдэлээн туран, өйөөн күрэхтэһэ кэлбит дьоммутугар барҕа махтал тылларын этэбит. Ураты махталы спонсордарбытыгар этэбит.

Бириистэри туруордулар: Вячеслав Данилов, Егор Борисов -- Буор Булгунньах, Валентина Прокопьева, Юрий Жегусов, Вероника Горохова, Октябрьскай нэһилиэк баһылыга Андрей Семенов, Тыараһа баһылыга Прокопий Турнин, Елена Яковлева, Петр Тарабукин, остуол тенниһин өрөспүүбүлүкэтээҕи федерацията, остуол тенниһин Дьокуускай куораттааҕы федерацията (Михаил Аксенов Михаил). Тэрийээччилэр идеяларын өйөөбүт дьоннорбутугар махталбытын тиэрдэбит.

Дьэ, бу курдук, үөрүү-көтүү аргыстаах, доҕордуу сыһыаҥҥа күрэхтэһии түмүктэннэ. Эһиил, бу түһүлгэҕэ көрсүөххэ диэри, теннисчиттэр!