Сийиэс бырагыраамата киэҥ. Ол курдук, кулун тутар 18 күнүгэр дэлэгээттэр АГАТУ-га табаһыттар идэлэрин үрдэтэр кылгас болдьохтоох кууруска үөрэниэхтэрэ, баҕалаахтар доруобуйаларын туругун көрдөрүнүөхтэрэ. Ил Түмэҥҥэ «Аартыка улуустарыгар олоҕу-дьаһаҕы тупсарыы уонна нэһилиэнньэ дохуотун тупсарыы» диэн тиэмэҕэ төрүт олохтоох хотугу омуктар дьокутааттарын Ассамблеятын мунньаҕа ыытыллыаҕа.
Кулун тутар 19 күнүгэр дэлэгээттэр сарсыарда өттүгэр Бырабыыталыстыба 2 №-дээх дьиэтигэр төрүт салааны сайыннарыы, таба иитиитигэр ыччаты тардыы курдук уо.д.а. тирээн турар боппуруостар тула кэпсэтиэхтэрэ. Күнүстэн киэһэ Бырабыыталыстыба 1 №-дээх дьиэтигэр Табаһыттар сийиэстэрин пленарнай мунньаҕа буолуоҕа.
Кулун тутар 20 күнүгэр Сайсары күөлгэ төрүт олохтоох хотугу омуктар национальнай уонна күннээҕи үлэҕэ кэтэр таҥастарын көрдөрүү, салааны сырдатар хаартыскалар, уруһуйдар быыстапкалара, «Бастыҥ таба сыарҕата» куонкурус, норуот уус-уран оҥоһуктарын дьаарбаҥката, «Көс дьиэ кэргэн» уонна «Табаһыттар оонньуулара» диэн хастыы да түһүмэхтээх өрөспүүбүлүкэтээҕи куонкурстар ыытыллыахтара.
Кулун тутар 21 күнүгэр А.Е. Кулаковскай аатынан Норуоттар доҕордоһууларын дьиэтигэр дэлэгээттэргэ анаммыт кэнсиэрт тэриллиэҕэ.
– Өрөспүүбүлүкэ салалтата табаны иитиигэ улахан болҕомтотун уурар. Ол курдук, быйыл салааны сайыннарыыга 1,3 млрд солк көрүлүннэ. Маннык өйөбүлгэ тирэҕирэн, хаһаайыстыбалар матырыйаалынай-тиэхиньиичэскэй баазаларын хаҥаталлар: дьиэ-уот, хараал, астыыр сыах тутталлар, анал тиэхиньикэлэри, пилота суох көтөр аппарааттары, күн уотун күүһүнэн үлэлиир ыстаансыйалары атыылаһаллар. Эдэр табаһыттар олорор дьиэ тутталларыгар анал бырагыраама үлэлиир. Биэс сыллааҕыта Ил Дархан Айсен Николаев кулун тутар бастакы өрөбүлүн Табаһыт күнүн бэлиэтиир туһунан ыйааҕы таһаарбыта. Бу – табаһыттар сыралаах үлэлэрин билинии, кинилэр өрөспүүбүлүкэ экэниэмикэтигэр киллэрэр кылааттарын сыаналааһын, тыйыс айылҕалаах хотугу дойдуну сылаас тыыннаан кэлбит өбүгэлэрбит төрүт үгэстэрин бөҕөргөтүү, салгыы сайыннарыы буолар.
Кулун тутар 18-21 күннэригэр Табаһыттар өрөспүүбүлүкэтээҕи төрдүс сийиэстэрин ыытыахпыт. Сийиэскэ 20 улуус табаһыттарын таһынан, табалаах эрэгийиэннэр, Арассыыйа Федерациятын Тыатын хаһаайыстыбатын министиэристибэтин бэрэстэбиитэлэрэ кыттыахтара, Китайтан, Монголияттан ыалдьыттар кэлиэхтэрэ. Сийиэс дэлэгээттэргэ эрэ буолбакка, киин куорат олохтоохторугар элбэх үтүө өйдөбүлү хаалларыа, дьону-сэргэни түмүө, табаны иитии сайдыытын атахтыыр кыһалҕалары быһаарарга болҕомтону тардыа, хотугу дойду кэрэ, уйан айылҕатыгар харыстабыллаахтык сыһыаннаһар ирдэнэрин өссө төгүл өйдөтүө. Киин куорат олохтоохторун, ыалдьыттарын сийиэс култуурунай бырагыраамаларыгар көхтөөхтүк кыттаргытыгар, хотугу дойду уратытын, кэрэтин көрөргүтүгэр ыҥырабыт, – диэн тыа хаһаайыстыбатын уонна ас-үөл бэлиитикэтин миниистирэ Артем Александров Табаһыт күнүнэн эҕэрдэтигэр эппитэ.
Ыспыраапка: Хотугу төрүт салааҕа (табаны иитиигэ, килиэккэлээх кыылы иитиигэ, бултааһыҥҥа уонна балыктааһыҥҥа) идэтийэр хаһаайыстыбалар өрөспүүбүлүкэ сирин-уотун 60 %-ын иччилээн, көрөн-истэн олороллор. Табаны иитиигэ 114 хаһаайыстыба идэтийэр, олорго 1245 киһи (1010 табаһыт, 235 чуумсук) үлэлииллэр. Кинилэр сыралааах үлэлэрин түмүгэр, күн бүгүҥҥү туругунан, 164 тыһыынча 79 таба баар. Саха Өрөспүүбүлүкэтэ табатын ахсаанынан Арассыыйаҕа иккис миэстэҕэ сылдьар.
Хаартыска эрэдээксийэ архыыбыттан
-
0
-
0
-
0
-
0
-
0
-
0
