Уопсастыба

Наталья Васильевна, Анатолий Семенович Семеновтар Дьэлиҥдэ кэтит-дэхси китиэмэлэринэн, киэҥ систэринэн көһө сылдьан, табаҕа үлэлээбиттэрэ. Онон, Гриша эдьиийэ Машенькалыын кыра эрдэхтэриттэн таба тобугун сыатынан эмсэхтэнэн, дьоллоох оҕо саастара ыстаадаҕа ааспыта. Кинилэр эһэлээх эбээлэрэ Мария Афанасьевна, Василий Иннокентьевич Николаевтар саастарын тухары табаттан илиилэрин араарбатах, холкуос, сопхуос биллэр-көстөр табаһыттара этилэр.

Григорий Семенов салайар 5 №-дээх ыстаадата Уудьа, Таба бастаах үрэхтэринэн көһө сылдьар. Ыстаадаҕа эдэр ыаллар Надежда, Петр Андреевтар уонна Василий Афанасьевич Николаев үлэлииллэр. Сайын кумаар, күлүмэн хойдор кэмигэр үөрдэрин халтаамаҕа хаайаллар, таба туйаҕын харыстаан, араан уларыттаары көһөллөр. Кыһыҥҥы өттүгэр бөһүөлэктэн тэйиччи кыстыыллар.

Биригэдьиир Григорий Семенов таба сыралаах үлэтигэр оҕо эрдэҕиттэн уһаарыллан, эдэрдэри үөрэтэр настаабынньык буола үүннэ. Табаһыттаабыта номнуо сүүрбэттэн тахса сыл буолбут, онно оскуолаҕа үөрэнэ сылдьан, сайын аайы төрөппүттэригэр көмөлөспүт сылларын эбэн кэбиһиэххэ. Кини тыа киһитин сиэринэн тугу барытын уһанар, сыарҕа, быа-туһах оҥостор. Сөбүлүүр дьарыга сайыннары, кыһыннары балыктыыр, кыыллыыр. Ардыгар хапкаан ииттэн, күндү түүлээҕи бултуур. Бөһүөлэккэ киирдэҕинэ, успуорт саалатыгар баран, футболга оонньуур. Табаһыттар улуустааҕы сүлүөттэригэр аллаах көлөлөрүн массыынанан тиэйэн илдьэн, сүүрдэн, бириистээх миэстэлэргэ тиксэр, хаста да кыайыылааҕынан таҕыста. Ол курдук, 2017 сыллаахха биир көскө сүүрдэн сүрүн бирииһи ылан үөрбүтэ. Дьэлиҥдэҕэ эмиэ Табаһыт күнүгэр сүүрдүүгэ бастакынан кэлэн, “АЛРОСА” хампаанньа туруорбут харчынан анал бирииһин хаһаайына буолбута.

Григорий бөһүөлэккэ сайылыыра да ахсааннаах, наар табаларыгар курдаттыы тартаран ыстаадатыгар бара турар. Өбүгэлэриттэн иҥмит таба кута тыатыгар, үөскээбит эйгэтигэр илдьэ турар. Оннук күүстээх кини табаларыгар таптала, сөбүлүүр идэтигэр бэриниилээҕэ.

-- Кыстык дьиэлэнэммит олус абыранныбыт, дириэктэрбит Егор Васильевич Иванов болох дьиэни туттаран, быйыл үһүс сылбытын кыстаан олоробут, -- диэн махтанан кэпсиир Григорий ийэтэ Наталья Васильевна.

Наталья Васильевна кэргэнин кытта биир ыстаадаҕа үлэлиир, төһө да доруобуйатынан хааччахтаннар, биригэдьиир уолун өйөөн, тэбис-тэҥҥэ үлэлэһэ, итэҕэһи-быһаҕаһы быһаарса сылдьар. Ийэ барахсан санаатын күүһэ, оҕолоругар кыһамньыта, таба үөскүүрүн туһугар туох баар сатабылын ууран дурда-хахха буолларбын диэн ыарыыны киэр кыйдаан көсүһэ сылдьара тугунан да сыаналаммат үтүө дьыала. Хоту дойду хоһуун дьахталлара бу курдук тымныыттан чаҕыйбат, итииттэн иҥнибэт, күүстээх санаалаахтар.

Григорий Анатольевич сүрдээх сымнаҕас, аһаҕас дууһалаах, оҕону кытта оҕо, кырдьаҕаһы кытта кырдьаҕас, элэккэй майгылаах, дьону кытары өрүү истиҥник кэпсэтэр, күлбүтүнэн үөрэ-көтө сылдьар. Киниттэн ол-бу кыайтарбат кыһалҕа, үлэ ыараханын туһунан төрүт истиэҥ суоҕа, ол курдук кини олоҕу сыаналыыр, сырдык ыралаах. Дьонуттан ыйыттахха, наар “ыстаадаҕа сылдьар” диэн буолар. Быйыл да кини салайар ыстаадатын табаларын туруктара үчүгэй, хаар халыҥ буолан, кыстыыр сирдэригэр оннуларын булан тураллар.

Маннык табаһыттардаах буоламмыт, Өлөөн баччаҕа диэри табалаах улуус диэн ааттанан кэллэ. Григорий Анатольевич Семенов курдук ыччаттарга холобур буолар дьон таһаарыылаах үлэлэрэ кэмигэр сыаналаныа диэн эрэнэбин. Кыһыҥҥы бытарҕан тымныыга, буурҕаҕа, сайыҥҥы үөҥҥэ-көйүүргэ көһө сылдьан, табаны оҕо курдук биэбэйдээн түүннэри-күнүстэри бостууктуурга, биир да күн өрөөбөккө үлэлииргэ элбэх сыра-хара наада. Маннык үлэни айылҕаттан бэриллибит талааннаах, чахчы да чулуу дьоннор эрэ баһылыыллар. Табаһыт үлэтэ билигин өссө ыараата, бырамыысыланнас сайдан, таба мэччирэҥэ сылтан-сыл аайы кыччаан иһэр.

Кулун тутар 18-21 күннэригэр Дьокуускайга ыытыллар Табаһыттар өрөспүүбүлүкэтээҕи IV сийиэстэригэр дэлэгээтинэн талабыт диэбиттэригэр, Григорий Анатольевич:

– Табаларбын кимиэхэ да хаалларбаппын, – диэн аккаастаан кэбиспит.