Ол курдук, норуот дьокутааттарын бөлөҕө – Ил Түмэн Судаарыстыбаннай Мунньаҕын спикерэ Алексей Еремеев, сис кэмитиэттэр бэрэссэдээтэллэрэ Александр Атласов, Владимир Прокопьев -- муус устар 9 күнүгэр Үөһээ Бүлүү улууһугар үлэтин саҕалаата. Сыал-сорук дьэҥкэ: тыа хаһаайыстыбатынан дьарыктанар үлэ дьонун кытары кэпсэтии, үлэ хаамыытын харгыстыыр кыһалҕалары миэстэтигэр көрүү-истии, кэккэ боломуочуйалар улуустарга бэриллибиттэринэн тыа хаһаайыстыбатын саҥа мэхэньиисимин уонна олохо киирэр саҥа сокуону дьүүллэһии итиэннэ инники соруктары быһаарсыы.
Норуот дьокутааттара бүгүн дьаһалта дьиэтигэр сарсыарда 10 чаастан мунньахтаатылар. Быйылгыттан аһы-үөлү оҥоруу сүрүн хайысхаларын улуустар бэйэлэрэ быһааралларыгар боломуочуйа бэриллибитинэн сибээстээн киирбит мэхэньиисимнэр тустарынан, олохтоох салайыныы саҥа сокуонун тула дьүүллэстилэр. Тыа хаһаайыстыбатыгар ханнык хайысхалары чорботор тоҕоостооҕун, сайдыыны харгыстыыр кыһалҕалары быһаарыы, бородууксуйаны батарыы, бородууксуйаны оҥорон таһаарыы, сиргэ үлэ боппуруостарын о.д.а. ырытыстылар, санаа атастастылар. Нэһилиэктэр баһылыктарын, тыа хаһаайыстыбатын исписэлиистэрин, кэпэрэтииптэр уонна бааһынай хаһаайыстыбалар салайааччыларын ыйытыыларыгар хоруйдаатылар, этиилэрин иһиттилэр.
Күнүстэн киэһэ норуот дьокутааттара хаһаайыстыбаларга, улуус устуоруйатын билсэр эбийиэктэргэ сылдьыахтара. Санатан эттэххэ, быйыл Үөһээ Бүлүү улууһа төрүттэммитэ 90 сыла бэлиэтэнэр. Бу туһунан Ил Түмэн пресс-сулууспата суруйар.
Хаартыскаҕа Василий Кононов (Ил Түмэн) түһэриитэ
-
0
-
0
-
0
-
0
-
0
-
0
