Норуот дьокутааттарын көрсөрүгэр улуус дьаһалтатын доруобуйа харыстабылыгар салаатын салайааччы Татьяна Бобровская каадыры олохсутан үлэлэтиигэ ыытыллар үлэни билиһиннэрдэ. Ол курдук, саҥа үлэлии кэлэр быраастарга «Земскэй дуоктар» бырагырааманан көрүллэр өйөбүлү таһынан, олохтоох бүддьүөттэн 1,5 мөл солк., АЛРОСА хампаанньаттан 500 тыһ солк. бэриллэр эбит. Быйыл маннык көмөнү 27 быраас ылбыт. Дьокуускайдааҕы медколледж Мирнэйгэ уонна Удачнайга баар салааларын кытары ситимнээх үлэ ыытыллар. Улуус киин балыыһатын сүрүн бырааһа Вера Тарасова иһитиннэрбитинэн, исписэлиистэри олохсутан үлэлэтиигэ төһө да итинник итинник үлэ ыытылыннар, быраастарынан хааччыллыы 57 %, орто сүһүөх исписэлиистэринэн хааччыллыы 67 % эбит.
Ил Түмэн доруобуйа харыстабылыгар сис кэмитиэтин бэрэссэдээтэлэ Светлана Давыдова өрөспүүбүлүкэ хотугу уонна бырамыысаланай улуустарыгар исписэлиис чахчы тиийбэтин эттэ, онон бу хайысхаҕа болҕомто мөлтүө суохтааҕын бэлиэтээтэ. Норуот дьокутаата Николай Ноттосов эмп үлэһиттэрин бэлэмниир үөрэх кыһаларыгар ити боппуруоһу учуоттуур наада диэтэ. Норуот дьокутааттара салгыы улуус баһылыгын бастакы солбуйааччы Дмитрий Ширинскэйи уонна киин балыыһа кэлэктиибин кытары көрүстүлэр.
Бу оробуочай сырыы чэрчитинэн, Светлана Давыдова Бүлүү эҥэр улуустар баһылыктара уонна киин балыыһалар сүрүн быраастара кыттыылаах доруобуйа харыстыбылыгар каадырынан хааччыллыыга анаммыт сүбэ мунньаҕы ыытыаҕа диэн Ил Түмэн пресс-сулууспата иһитиннэрэр.
-
0
-
0
-
0
-
0
-
0
-
0
