И.С. Жараев аатынан Саха Өрөспүүбүлүкэтин норуоттарын аудиовизуальнай нэһилиэстибэтин национальнай киинэ улахан чинчийэр үлэни ыытан, Москуба куорат Красногорскайдааҕы киинэнэн докумуон архыыбыттан 1975 сыллаахха уһуллубут улахан, сүдү суолталаах историческай киинэни булла.
Документальнай киинэ биһирэмигэр бэтэрээннэр, устуоруктар, ыччаттар, киинэҕэ уһуллубут бэтэрээннэр сиэннэрэ, хос сиэннэрэ кыттыыны ыллылар. Кинилэр бары биир ситим буолан ынырык сэрии суолтатын өссө төгүл өйдөөннөр, эйэ туругурарын, норуот сомоҕолоһоллорун туһугар үлэ ыччакка туһуланарын бигэргэттилэр.
Киинэ биһирэмин аһыллыытын ХИФУ устудьуоннара Дарина Пшенникова, Василий Полускин, Есения Зостровская, Арылхан Петров «Синий платочек» үҥкүүнү үҥкүүлээн, Табаҕатааҕы оҕо ускуустубатын преподавателэ, Саха Өрөспүүбүлүкэтин култууратын туйгуна Ирина Протопопова «Туруйалар ааһаллар» бэртээхэй ырыаны ыллаан киэргэттилэр.
И.С. Жараев аатынан Саха Өрөспүүбүлүкэтин норуоттарын аудиовизуальнай нэһилиэстибэтин национальнай киинин дириэктэрин солбуйааччы Гаврил Харлампьев маннык эттэ:
-- Бу документаьнай киинэ лиэнтэтэ уһун сылларга чинчийии түмүгэр булулунна. Биһиги өссө да чинчийэр-көрдүүр үлэбитин салгыыбыт, аудиовизуальнай докумуоннары өрөспүүбүлүкэбитигэр да, Арассыыйа киин куораттарыгар, атын да эрэгийиэннэригэр тиэрдэбит, үйэтитэбит.
Салгыы кииннэммит библиотечнай ситим дириэктэрэ Ньургуйаана Решетникова, Дьокуускай куорат архыыбын дириэктэрэ Ли Индира тыл эттилэр. Улахан, сүдү үлэни сыаналаан «Таатта» түмсүү салайааччыта Владимир Аржаков Киин дириэктэрэ Степан Москвитиҥҥа, пуонда сүрүн харайааччытыгар Анна Пшениковаҕа Махтал суруктары туттарда.
Киинэ көрдөрүллүөн иннинэ, Национальнай киин архивистара Альбина Данилова, Ньургуйаана Андрева бу булуллубут киинэ сүдү сыаналааҕын, норуокка наадалааҕын эттилэр.
Киинэҕэ уһуллубут сэрии бэтэрээннэрин сиэннэрэ, хос сиэннэрэ Кыайыыны уһансыбыт хаан-уруу эһэлэрин бу баалларын курдук санаан-ахтан аастылар. Үтүө өйдөбүнньүгү, үйэтитиини оҥорбуттарын иһин Киин үлэһиттэригэр махтаннылар. «Саха» НКИХ кэрэспэндиэннэрэ интервью ыллылар, репортаж оҥордулар. Тэрээһин түмүгэр, «Таатта» түмсүү кыттыылааҕа Александра Максимова Ольга Иванова тылыгар уонна мелодиятыгар “Аҕам суруктара” ырыаны толордо.
Хаартыскалары ааптар хааччыйда
-
0
-
0
-
0
-
0
-
0
-
0
