Сүрүн кэпсэтии улууспутугар буолаары турар «Манчаары Оонньууларын» тэрээһинигэр көмө, өйөбүл буолуу. Өрөбүл да күн буоллар, дойдуларын туһугар ыалдьар дьон кэлбиттэр, боппуруостары биэрдилэр, сүбэлээтилэр, бэйэлэрин көрүүлэрин чопчу эттилэр. Көрсүһүү саҕаланыытыгар улуус баһылыга Айаал Бурцев Анал байыаннай дьайыыга алта ый сылдьан кэлбитин туһунан сэһэргээтэ, «Манчаары Оонньууларыгар» бэлэмнэнии билиҥҥи туругун, өссө туох үлэ барыахтааҕын билиһиннэрдэ. Баһылыкпыт этэҥҥэ кэлбитин уруйдаан, «Уус Таатта» түмсүү актыбыыһа Александра Максимова «Тааттаҕа» ырыатынан эҕэрдэлээтэ.
Көрсүһүү кыттыылаахтара кэпсэтиигэ көхтөөхтүк кытыннылар. «Таатта» түмсүү иһинэн бу соторутааҕыта «Манчаары Оонньууларын» пуондатын өйүүр штаб үлэтин саҕалаабыта. Штаб салайааччыта Светлана Дарбасова бу үлэҕэ түмсүү эмиэ хамсааһыны таһааран эрэрин, улуус дьаһалтатын кытта ыкса сибээстээхтик үлэлиирин, куорат тэрилтэлэригэр үлэлиир биир дойдулаахтар, чуолаан оскуолалар, улуус биллэр-көстөр дьоно-сэргэтэ өйүүллэрин, инникитин үлэ өссө күүскэ барыаҕын иһитиннэрдэ. Куоракка олорор биир дойдулаахтарын бу пуонданы өйүүргэ ыҥырда.
Улуус баһылыгын солбуйааччы Руслан Захаров бу көмө, өйөбүл чопчу ханнык хайысханан барыахтааҕар санаатын эттэ. Дьокуускайга олорор таатталар бу ыытыллар «Манчаары Оонньууларыгар» сүрүн күүс буолуохтарыгар эрэнэрин биллэрдэ. Биллэн турар, пуондаҕа биирдиилээн дьонтон бөдөҥ сууммалар киирбиттэрин үөрэ-көтө бэлиэтээтэ, урбаанньыттартан уонна тэрилтэлэргэ үлэлиир биир дойдулаахтарбытыттан өйөтөр сөбүн эттэ.
Көрсүһүүгэ кэлбит таатталар элбэх этиилэри киллэрдилэр, өйүүллэрин биллэрдилэр. Кырдьык, кинилэр бары төрөөбүт сирдэригэр, Тааттаҕа, сахалар Олимпиадаларынан ааттанар «Манчаары Оонньуулара» үрдүк таһымҥа ааһарыгар баҕараллар. Ытык дойдубутугар, Тааттаҕа, төһөлөөх араас үрдүк таһымнаах түһүлгэ ыытыллыбыта буолуой? Бу да сырыыга өбүгэбит саҕаттан оонньонор күөн күрэс эмиэ үрдүк таһымҥа ааһарыгар баҕараллар.
Кинилэр бу өйөбүллэринэн төрөөбүт Таатталарын таптыылларын, кини аатыгар сүгүрүйэллэрин көрдөрөллөр. Тапталлаах Тааттабыт туһугар бары бииргэ!!!
-
2
-
0
-
0
-
0
-
0
-
0
