Уолбут онно артиллерист быһыытынан сулууспалаан этэҥҥэ дойдутугар, оруобуна төрөөбүт күнүгэр эргиллэн кэлэн, икки хос өрөгөйдөөх үөрүү буолла. Куоракка кэлэн, Сунатартан төрүттээх устудьуоннар «Түмэн» түмсүүлэрин кытары көрсүһэн, гуманитарнай көмөнү оҥорбута.
Бэҕэһээ, ол эбэтэр ыам ыйын 6 күнүгэр, Сунтаар аэропуордугар уруулара, доҕотторо, бииргэ үлэлиир дьоно, эдэр армеецтар үөрэ-көтө көрүстүлэр. Онтон тута «Партизан» култуура киинигэр нэһилиэнньэни кытта көрсүһүү буолла. Олох сулустар кэнсиэртэрин курдук, саала тобус-толору! Улуу Кыайыы 80 сыла чугаһаан, араас тэрээһин ыытыллар кэмигэр бу сунтаардар уолларын хайдах курдук таптыылларын, ахтыбыттарын, нэһилиэнньэ аҕа баһылыгын хайдах курдук убаастыырын дьэҥкэ көстүүтэ диэн сыаналыыбын. Көрсүһүү бойобуой доҕоттору ахтан-санаан ааһыыттан саҕаланан, сулууспа туһунан аһаҕас кэпсэтиинэн, дойдуттан тиийэр кэһии олус үөрүүлээҕин, күндүтүн этэн туран, дойдутун дьонугар махталынан ааста. Улуус баһылыга Анатолий Григорьев эҕэрдэтэ, бэлэҕэ хаһан да буоларын курдук истиҥ.
Улуус киинин сирэй баһылыга барбытын улаханнык суохтаппакка, баһылык эбээһинэһин толорооччу Семен Николаев хамаандата олус бэркэ үлэлээтэ. Манна биири бэлиэтиир олус тоҕоостоох дии саныыбын. Быйылгы курдук халыҥ хаардаах сылга, отой эрдэттэн дьаһанан, ханаабалары ыраастаан, уу барар суолларын арыйыы үлэтин ыытаннар, быйыл сэлиэннэбит ууга барбата. Мин уолаттарбар ийэлии махтанабын. Баһылыкпыт үрдээн, өссө үрдүк үрдэллэри дабайарыгар эрэллээх солбугу иитэн таһаарбыт эбит диэн сэмээр үөрэбин.
Дьоллоох-соргулаах Сунтаар, тапталлаах уолуҥ дойдутугар кэллэ, өссө сырдык саҕахтар арылынныннар. Уолаттарбыт олохпут уйгутун тупсаралларын тухары Сунтаарга олох күөстүү оргуйдун!
-
13
-
1
-
0
-
0
-
1
-
0
