Уопсастыба

Өйдөбүнньүк аахсыйаҕа СӨ Ил Дархана Айсен Николаев, РФ үөрэҕин миниистирэ Сергей Кравцов, Федерация Сэбиэтин чилиэннэрэ, РФ Судаарыстыбаннай Дууматын, итиэннэ СӨ Судаарыстыбаннай Мунньаҕын (Ил Түмэн) дьокутааттара, СӨ Бырабыыталыстыбатын чилиэннэрэ, Дьокуускай куорат уокуруктааҕы дьаһалтатын салалтата, бэтэрээннэр, уопсастыбаннас уонна кэнчээри ыччат кытыннылар.

СӨ Ил Дархана Айсен Николаев: «Бу күн алдьархайдаах сэриигэ олохторун толук ууран Кыайыыны бэлэхтээбит дьоммутун кэриэстээммит «Өйдөбүнньүк чүмэчитигэр» муһуннубут. Биһиги көҥүл уонна сувереннай Арассыыйаҕа олорорбут туһугар 27 мөлүйүөнтэн тахса биир дойдулаахпыт сырдык тыына быстыбыта. Бүгүн биһиги буойуннарбыт арҕаа дойдулар өйөбүллэрин ылбыт фашизмы кытта эмиэ кыргыһаллар. Кинилэри, биһигини курдук, Улуу Кыайыы туһунан өйдөбүл көҕүлүүр. Бу күн ордук ыччакка улахан суолталаах. Устуоруйабыт чахчытын өйдүү сылдьыҥ, үгүстэр ону уларыта сатыыллар. Ол эрээри, мин дьоруойдары кэриэстии кэлбит тыһыынчанан эдэр дьону көрдөхпүнэ, дойдубут куруутун кыайыылаах буолуо диэн эрэнэбин. Тоҕо диэтэххэ, биһиги Ытык өйдөбүллээхпит, кинини ким да былдьыа суоҕа! Ким да умнуллубат! Туох да умнуллубат!» - диэн эттэ.

Бочуоттаах ыалдьыт, оробуочай сырыытынан өрөспүүбүлүкэҕэ кэлэ сылдьар РФ үөрэҕин миниистирэ Сергей Кравцов: «Бүгүн дойдубут туһугар, итиэннэ аныгы көлүөнэ олорорун иһин олохторун биэрбит, фашизмы кыайбыт, сирбитин босхолообут дьоммутун ахтабыт-саныыбыт. Аҕа дойду Улуу сэриитин дьоруойдарыгар уонна тыыл үлэһиттэригэр сүгүрүйэбит. Кыайыыны аҕалбыт ол хорсун быһыыларын мэлдьи өйдүөхпүт. Өйүүн ыам ыйын 9 күнүн көрсүөхпүт. Эһигини бука барыгытын бу дойдубут сүрүн бырааһынньыгынан, эйэ бырааһынньыгынан эҕэрдэлиибин!», - диэн аахсыйа кыттыылаахтарын эҕэрдэлээтэ.

Ыам ыйын 7 күнүгэр «Өйдөбүнньүк чүмэчитэ» Бүтүн Арассыыйатааҕы аахсыйа Дьокуускай Кыайыы болуоссатыгар 16-с төгүлүн ыытылынна. Аахсыйа кыттыылаахтара Аҕа дойду сэриитигэр эйэлээх олох туһугар олохторун толук уурбут, Кыайыы кынаттаах эргиллэн кэлбит, тыылга Кыайыыны уһансыбыт бэтэрээннэр сырдык ааттарыгар сүгүрүйэн уматыллыбыт чүмэчилэринэн «ПОБЕДА 80» диэн тылы тэлгэттилэр. Өбүгэлэрбит хорсун быһыыларыгар дириҥ ытыктабылы биллэрэр чүмэчи уота болуоссаты сылаас, сырдык уотунан сандаарта.

Аахсыйа араас көлүөнэ икки ардыларыгар дириҥ сибээһи олохтоото, итиэннэ ааспыт кэм устуоруйатын туһунан өйдөбүлү харыстыыр, кэриэстиир сүдү суолталааҕын өйдөттө.

Санаттахха, Аҕа дойду Улуу сэриитигэр Саха Сириттэн 62 091 киһи ыҥырыллан кыттыбыта. Олортон 26129 саллаат сэрии толоонугар охтубута, сураҕа суох сүппүтэ.

Хаартыскалар: Василий Кононов түһэриитэ уонна Ил Дархан ТГ-ханаалыттан